FC Bayern Munich ka shkruar historinë në Bundesligë në fund të gjysmës së parë të sezonit, duke vendosur rekorde të reja dhe duke konfirmuar dominimin absolut në futbollin gjerman. Edhe pse titulli jozyrtar i ‘Hinrundenmeister’ (kampion i gjysmës së parë) ishte siguruar që para Krishtlindjes, dy ndeshjet e fundit të vitit të ri vetëm sa e theksuan më tej epërsinë e bavarezëve.

Skuadra e drejtuar nga Vincent Kompany e ka mbyllur gjysmën e parë me 47 pikë dhe një golavarazh mbresëlënës prej +53, duke realizuar kështu nisjen më të mirë në historinë e Bundesligës pas 17 javësh. Rekordi i mëparshëm mbahej po nga Bayerni, në sezonin 2013/14 nën drejtimin e Pep Guardiolës, kur kishin po 47 pikë, por me një golavarazh shumë më modest prej +35.

Ajo që bie më shumë në sy është fuqia sulmuese e Bayernit. Me plot 65 gola të shënuar, Harry Kane dhe shokët e tij kanë thyer rekordin e mëparshëm prej 56 golash të vendosur nga vetë Bayerni në sezonin 2021/22. Bavarezët kanë shënuar të paktën dy gola në të gjitha 17 ndeshjet e kampionatit deri tani, ndërsa seria shtrihet në 25 ndeshje radhazi në Bundesligë, duke përfshirë edhe fundin e sezonit të kaluar.

Aktualisht, Bayern kryeson me 11 pikë avantazh ndaj ndjekësit më të afërt, Borussia Dortmund. Një diferencë e tillë nuk është përmbysur kurrë në historinë e Bundesligës, çka e bën skuadrën e Kompany favorite absolute për titullin. Gjysma e dytë e sezonit nis këtë të shtunë me supersfidën në transfertë ndaj RB Leipzig, ku bavarezët synojnë të vazhdojnë marshimin historik.