Álvaro Arbeloa është trajner i Real Madridit në të gjitha aspektet. Nuk bëhet fjalë për një zgjidhje të përkohshme apo një “arnim” deri në fund të sezonit. Sipas informacioneve që ka siguruar MARCA, tekniku ka firmosur një kontratë të re që e lidh me klubin madrilen edhe përtej muajit qershor.

Burime pranë kësaj gazete bëjnë me dije se marrëveshja është për këtë sezon plus edhe një tjetër, çka konfirmon besimin e klubit tek Arbeloa si projekt në stolin e ekipit të parë. Ideja është që ai të vazhdojë të drejtojë skuadrën edhe pas përfundimit të këtij sezoni, përveç rastit kur drejtoria sportive dhe presidenca vlerësojnë se objektivat e vendosura nuk janë arritur dhe vendosin të ndahen me të.

Megjithatë, Arbeloa ka zgjedhur të tregojë kujdes në deklarata në paraqitjen e tij të parë publike si trajner i Real Madridit. Ai shmangu komentet mbi situatën kontraktuale dhe u kufizua duke thënë se do të jetë në detyrë “për aq kohë sa klubi do të dëshirojë”.

Ja si përbëhet stafi i tij teknik

Projekti i ri i Arbeloas shoqërohet edhe me ndryshime të rëndësishme në stafin teknik. Risia kryesore është Antonio Pintus, i cili do të jetë përgatitësi fizik i ekipit të parë. Krahas tij do të punojë edhe Ricardo da Silva, deri tani përgjegjës i përgatitjes fizike tek ekipi filial.

Ndihmësi i tij kryesor dhe krahu i djathtë do të jetë Julián Carmona, mik personal i trajnerit dhe figurë kyçe në sukseset e tij, që do të mbajë rolin e zëvendëstrajnerit. Kevin Cardeiro gjithashtu do të ndjekë Arbeloan dhe do të jetë një nga asistentët e tij personalë.

Ndryshe nga pjesa tjetër e stafit, Diego López nuk do të vazhdojë në këtë etapë pranë Arbeloas. I ardhur verën e kaluar si trajner i portierëve te filiali, ai do të vijojë punën si trajner portierësh te Real Madrid Castilla. Ndërkohë, në ekipin e parë, puna specifike me portierët Courtois dhe Lunin do të mbetet në duart e Luis Llopis, i cili ka kontratë të veçantë me klubin dhe është i pavarur nga çdo staf teknik.

Anëtari i gjashtë dhe i fundit i stafit do të jetë Francis Sánchez, në rolin e analistit teknik.

Në këtë mënyrë, Arbeloa nis aventurën e tij në stolin e Real Madridit me stabilitet kontraktual dhe me një ekip pune të ndërtuar pjesërisht sipas dëshirës së klubit dhe pjesërisht sipas filozofisë që ka ndjekur vetë trajneri madrilen në karrierën e tij.