Përballja mes Villarreal-it dhe Barcelonës, e planifikuar fillimisht të luhej në Miami si pjesë e javës së 17-të të La Ligës, nuk do të zhvillohet më në Shtetet e Bashkuara. Vendimi erdhi pas protestave të lojtarëve dhe sindikatave, të cilat kundërshtuan zhvendosjen e ndeshjes jashtë Spanjës.

Klubi katalanas reagoi përmes një komunikate zyrtare, duke e pranuar me keqardhje këtë vendim:

“Barcelona e respekton dhe e pranon vendimin për të anuluar ndeshjen ndaj Villarreal-it në Miami, ashtu siç më parë kishte respektuar vendimin për ta zhvilluar atë.”

Në të njëjtën kohë, Barça shprehu zhgënjimin për humbjen e një mundësie të vlefshme për ta promovuar kampionatin spanjoll në një treg strategjik si ai amerikan, me potencial të madh për rritje dhe gjenerim të të ardhurave të reja në përfitim të gjithë futbollit spanjoll.

“Klubi e respekton dhe e pranon vendimin e marrë,” – thuhet në njoftim – “por e bën këtë me keqardhje për humbjen e një mundësie të rëndësishme për promovimin ndërkombëtar të La Ligës.”

Barcelona gjithashtu falënderoi tifozët dhe tifozen e saj në Shtetet e Bashkuara për dashurinë dhe mbështetjen e vazhdueshme ndër vite, duke theksuar keqardhjen që ata nuk do të kenë mundësinë të shohin një ndeshje zyrtare të klubit në tokën amerikane.

Nisma për të zhvilluar një ndeshje të kampionatit në SHBA ishte pjesë e strategjisë së La Ligës për ta ndërkombëtarizuar kompeticionin dhe për ta rritur tërheqjen e tij globale. Megjithatë, anulimi i kësaj ndeshjeje tregon vështirësitë organizative dhe pengesat institucionale që ende shoqërojnë projekte të tilla, pavarësisht interesit në rritje të publikut amerikan ndaj futbollit europian.