Tadej Pogacar e ka bërë sërish. Fenomeni slloven i UAE Emirates ka fituar Kampionatin Botëror të Çiklizmit 2025 në Ruandë, duke mbajtur mbi supe për vitin e dytë radhazi fanellën me ngjyrat e ylberit. Pas triumfit në Zvicër vitin e kaluar, ai ka shkëlqyer këtë herë në Kigali, ku pas një gare të jashtëzakonshme prej 267,5 kilometrash dhe mbi 6000 metrash ngjitje, ka kaluar i vetëm vijën e finishit me kohën 6 orë, 21 minuta e 20 sekonda.

Pogacar nisi sulmin vendimtar 104 km nga fundi, në një moment kur gara ishte ende e hapur. Ritmi i tij shkatërrues vuri në vështirësi rivalët, përfshirë belgun Remco Evenepoel, kampion bote në provën me kohë, i cili nuk arriti të mbante ritmin dhe madje pati dy ndalesa për ndërrim biçiklete. Në ndjekje provuan Del Toro nga Meksika dhe Ayuso nga Spanja, por vetëm për pak kohë: në ngjitjen e famshme të Mur de Kigali, Pogacar mbeti vetëm dhe prej aty nisi një ecje triumfale drejt titullit.

Në fund, slloveni shënoi një tjetër sukses historik, duke u bërë çiklisti i parë që arrin podiumin për tri vite rresht si në Tour de France, ashtu edhe në Botëror. Pas tij, Evenepoel u rikthye në garë në kilometrat e fundit dhe siguroi vendin e dytë me +1’29”, ndërsa podiumi u plotësua nga irlandezi Ben Healy, që mposhti danezin Skjelmose për medaljen e bronztë.

Ky është titulli i nëntë botëror për çiklistët sllovenë në dekadën e fundit dhe i dyti personal për Pogacar, që tashmë konfirmohet si “kannibali” i gjeneratës së tij. Pas një dështimi në kronometrin e javës së kaluar, ai e shfrytëzoi në maksimum garën në linjë për të treguar se mbetet kampioni absolut i momenteve të mëdha.