Jannik Sinner konfirmon edhe një herë formën e tij të jashtëzakonshme në US Open. Numri një në botë mposhti australianin Alexei Popyrin me rezultatin e pastër 6-3, 6-2, 6-2, duke u kualifikuar për në raundin e tretë të turneut. Ndeshja zgjati vetëm dy orë e një minutë, ku italiani tregoi një dominim absolut: lejoi vetëm gjashtë mundësi për “break” dhe nuk e humbi asnjëherë shërbimin.

Në setin e parë, Sinner u shkëput shpejt 2-0, duke kontrolluar lojën deri në fund dhe mbyllur 6-3. Në të dytin, Popyrin arriti të krijonte presion vetëm në një “game” të gjatë, ku pati katër mundësi për “break”, por italiani i anuloi me qetësi dhe e ktheu menjëherë ritmin në favorin e tij, duke e mbyllur 6-2. Seti i tretë ndoqi të njëjtën rrjedhë: australiani pati dy shanse për të rikthyer ndeshjen në ekuilibër, por Sinner reagoi si një kampion, u shkëput 3-1 dhe nuk shikoi më prapa.

Me këtë fitore, Sinner jo vetëm konfirmon statusin e tij si favorit kryesor i turneut, por edhe u dërgon një mesazh të qartë rivalëve të tjerë për titullin. Në raundin e tretë, ai do të përballet me kanadezin Denis Shapovalov, i cili eliminoi francezin Valentin Royer pas katër setesh të luftuara.

Sinner, që kërkon trofeun e tij të parë në Flushing Meadows, duket më i vendosur se kurrë për ta bërë të vetin edhe këtë Grand Slam.