Gianluigi Donnarumma është gjithnjë e më afër kalimit te Manchester City. Pas largimit praktikisht nga PSG para finales së Superkupës, kapiteni i Italisë duket se është gati të nisë aventurën e tij në Premier League.

Sipas mediave britanike, klubi francez është i gatshëm të pranojë ofertën prej 30 milionë eurosh nga “citizens”, ndonëse kërkesa fillestare arrinte deri në 50 milionë. Arsyeja kryesore është paga e lartë e portierit, të cilën PSG nuk dëshiron ta mbajë më gjatë në listën e pagave, veçanërisht nëse ai do të qëndronte pa luajtur deri në janar.

Nga ana tjetër, Donnarumma ka arritur tashmë një marrëveshje parimore me klubin e Guardiolës, siç ka zbuluar agjenti i tij Enzo Raiola. Megjithatë, transferimi varet nga e ardhmja e Ederson-it: portieri brazilian është objektivi kryesor i Galatasaray-t, por marrëveshja mes klubeve ende nuk është mbyllur.

Në momentin që operacioni i Ederson do të finalizohet, Donnarumma pritet të zbarkojë në Angli. Për kalimin e tij te Manchester City, duket se është vetëm çështje kohe.