Dy prej kombëtareve favorite të Botërorit 2026, Spanja dhe Belgjika, janë gati të zbresin në fushë për ndeshjet e tyre të para në turne.

Spanja do të përballet me Kepin e Gjelbër në Atlanta dhe pritet të ketë në dispozicion të gjithë grupin e lojtarëve. Megjithatë, trajneri Luis de la Fuente po mendon t’u japë pushim disa prej emrave më të rëndësishëm në formacionin titullar.

Mes tyre është edhe Lamine Yamal, i cili është rikthyer së fundmi në stërvitje pas një dëmtimi në muskulin e kofshës së majtë. Talenti 18-vjeçar u dëmtua më 22 prill dhe mungoi në fundin e sezonit me Barcelonën për t’u rikuperuar plotësisht për Kupën e Botës.

Yamal konsiderohet si një nga yjet më premtues të futbollit botëror. Ai përfundoi i dyti në garën për Topin e Artë 2025 dhe ndihmoi Barcelonën të fitonte La Ligën në vitin 2026, duke regjistruar 16 gola dhe 11 asistime. Edhe pse është shpallur i gatshëm për të luajtur, pritet që ai ta nisë ndeshjen nga stoli.

Spanja konsiderohet një nga pretendentet kryesore për triumfin final, duke synuar ta fitojë për herë të dytë Kupën e Botës pas suksesit të vitit 2010. Ndërkohë, Kepi i Gjelbër merr pjesë për herë të parë në një Botëror dhe shihet si skuadra më pak e favorizuar e Grupit H.

Në Grupin G, vëmendja do të përqendrohet te përballja mes Belgjikës dhe Egjiptit në Seattle. Ndeshja do të sjellë përballë dy prej futbollistëve më të njohur të dekadës së fundit, Kevin De Bruyne dhe Mohamed Salah.

De Bruyne, 34 vjeç, vjen pas një sezoni të vështirë për shkak të një dëmtimi serioz në kofshë, por mbetet lideri i Belgjikës. Nga ana tjetër, Salah vazhdon të jetë figura kryesore e Egjiptit, edhe pse ende nuk ka arritur ta çojë kombëtaren e tij përtej fazës së grupeve në një Botëror.

Para ndeshjes, mesfushori belg foli me respekt për rivalin e tij të vjetër. “Kam luajtur kundër Mo Salah-ut për 10 vite. Madje edhe fëmijët tanë kanë ndjekur të njëjtën shkollë. Ai është një person shumë i mirë dhe do të jetë kënaqësi ta takoj sërish. Do të jetë bukur të garojmë përsëri si në kohët e vjetra”, deklaroi De Bruyne.

Përballja mes Belgjikës dhe Egjiptit pritet të jetë një nga sfidat më interesante të ditës, me dy skuadra që synojnë ta nisin Botërorin me fitore.