Edicioni i ri i Champions League do të ketë dy rekorde gjeografike unike: skuadrën më në lindje dhe atë më në veri që kanë marrë pjesë ndonjëherë në turne.

Pas një rrugëtimi mbresëlënës, Kairat Almaty eliminoi Olimpija Ljubljanën, KuPS-in, Slovan Bratislavën dhe së fundmi Celtic me penallti, duke u kualifikuar për herë të parë në fazën kryesore të Champions League. Kjo është vetëm skuadra e dytë nga Kazakistani që arrin këtë nivel, pas Astanës në vitin 2015. Almaty, qyteti më i madh i vendit, ndodhet pranë kufirit me Kirgistanin dhe vetëm pak orë nga Kina, çka e bën çdo transfertë jashtëzakonisht të vështirë. Distanca nga Lisbona, për shembull, shkon deri në 8.521 km.

Nga ana tjetër, veriu i Evropës sjell një tjetër rekord: Bodo/Glimt. Klubi norvegjez, i vendosur brenda Rrethit Polar Arktik, zëvendëson Rosenborgun si ekipi më verior në historinë e Champions. Vetëm disa muaj më parë, ata shkuan deri në gjysmëfinalet e Europa League duke eliminuar edhe Lazion. Qyteti i Bodos ka vetëm 43 mijë banorë, duke e bërë një nga realitetet më të vogla të përfaqësuara ndonjëherë në kompeticion.

Ndërkohë, për herë të parë në histori, edhe Paphos nga Qipro arrin Champions League, vetëm 11 vite pas themelimit. Klubi ka një lidhje italiane përmes drejtorit sportiv Cristiano Giaretta, ish-drejtues i Novarës dhe Udineses.

Ky edicion i Champions pritet të jetë unik jo vetëm sportivisht, por edhe gjeografikisht, duke zgjeruar kufijtë e garës më prestigjioze të futbollit europian.