Tenisti i cili kryeson në renditje, Jannik Sinner, dhe dy herë fituesi i titullit, Carlos Alcaraz (nr. 2 në botë), do të shkruajnë sot një kapitull të ri në rivalitetin e tyre në finalen e Wimbledon. 

Dy yjet e rinj të tenisit, 23-vjeçari Sinner dhe 22-vjeçari Alcaraz, kanë të gjithë të ardhmen përpara tyre, por tashmë janë vendosur fort në majat e sportit, duke zënë vendet që dikur i përkisnin legjendave si Roger Federer, Rafael Nadal dhe Novak Djokovic.

38-vjeçari Djokoviç, i vetmi që është ende aktiv nga ‘Treshja e Madhe’, u eliminua në tre sete dhe për më pak se dy orë nga Sinner, numri një aktual në botë, i cili shpesh krahasohet me të për stilin në fushë, me një ndryshim të dukshëm: është më i ri dhe më karizmatik.

Nga ana tjetër, spanjolli Alcaraz pati një përballje më të vështirë, duke kaluar plot gati një orë më shumë për të mposhtur numrin 5 në botë, Taylor Fritz, dhe për të siguruar finalen e gjashtë Grand Slam të karrierës, dhe të tretën radhazi në Wimbledon.

Katër turnetë e mëdhenj të tenisit (Grand Slam) janë kthyer në një duel mes këtyre dy ‘mbretërve’ të rinj, pasi kanë ndarë mes tyre gjashtë titujt e fundit që nga fillimi i vitit 2023, nga tre secili.

Megjithatë, Sinner nuk dëshiron të krahasohet ende me legjendat:
“Nuk mund ta krahasojmë me atë që kanë bërë 'Treshja e Madhe' për më shumë se pesëmbëdhjetë vjet. Gjashtë turne Grand Slam përfaqësojnë vetëm një vit e gjysmë, nuk jemi ende në të njëjtin nivel.”