Futbollistët e Kombëtares shqiptare që luajnë në kampionatet jashtë vendit kanë mbyllur një tjetër javë me paraqitje pozitive me klubet e tyre.

Nedim Bajrami gjeti golin e parë në sezonin e ri në kampionatin italian, në fitoren e Sassuolo 2-1 përballë Interit.

Fantazisti i Kombëtares shqiptare, realizoi një gol mjaft të bukur falë një goditjeje të menjëhershme brenda zonës.

Ndërkaq edhe paraqitja e tij ishte mjaft pozitive duke u vlerësuar si një prej më të mirëve të skuadrës në triumfin me përmbysje përball Interit.

Në Spanjë, Myrto Uzuni la pas dëmtimin që pësoi në përballjen me Real Betis dhe u rikthye me gol në barazimin e Grandës në transfertë përball Almerias me rezultatin 3-3.

Sulmuesi kuqezi e nisi ndeshjen nga stoli dhe u aktivizua në lojë në minutën e 73, teksa katër minuta përpara përfundimit të kohës së rregullt u tregua i saktë përball portierit.

Kristian Shpendi vijon të shënojë rregullisht me skuadrën e Çezenës në Serinë C Italiane.

Sulmuesi i Kombëtares shqiptare U-21 realizoi tre gola në dy sfidat e Çezenës përballë Spal dhe Rimini.

Mesfushori kuqezi Arbnor Muçolli po kalon gjithashtu një formë mjaft të mirë në kampionatin suedez. Mucolli, i cili aktivizohet në radhët e Goteborg i dhuroi barazimin skuadrës së tij, duke realizuar në minutat shtesë falë një penalltie.

Pas një periudhe të gjatë te goli u rikthye edhe Endri Çekiçi. 26-vjeçari i cili aktivizohet në kampionatin turk me skuadrën e Pendikspor, gjeti golin në minutën e 36-të në humbjen e skuadrës së tij në transfertë përballë Trabzonspor. 

Protagonist në kampionatin turk në javën që lamë pas u shfaq edhe Odise Roshi.

32-vjeçari i cili aktivizohet me Sakaryaspor asistoi në golin e parë, në fitoren e skuadrës së tij me rezultatin 2-0 përballë Eyupspor.

Minuta në këmbë kanë pasur edhe legjionarët e tjerë të Kombëtares, duke nisur nga Elhan Kastrati dhe Etrit Berisha  në portë, te mbrojtësit Berat Gjimshiti, Frederic Veseli, Elseid Hysaj dhe Ivan Balliu.

Në mesfushë Ylber Ramadani është shndërruar në një titullar i padiskutueshëm për skuadrën e Lecce, ndërsa një kontribut të madh dha edhe Kristjan Asllani një fitoren e thellë të Interit 4-0.

Mesfushori kuqezi u aktivizua në minutën e 54 kur rezultati ishte ende 0-0.

Një formë mjaftë të mirë po kalon edhe Klaus Gjasula me skuadrën e Darmstadt, ndërsa Keidi Bare luajti 81 minuta në humbjen minimale 1-0 të Espanyol përballë Tenerife.

Sulmuesit Jasir Asani, Mirlind Daku, Taulant Seferi, Arbnor Muja, Ernest Muçi janë aktivizuar të gjithë si titullar me skadrat e tyre.

Java që sapo ka nisur është shumë e rëndësishme për Kombëtaren shqiptare, pasi trajneri Sylvinho do të shpallë listën për dy ndeshjet e tetorit, ndaj Republikës Çeke në datë 12 e vlefshme për kualifikueset e Europianit “Gjermani 2024” dhe miqësoren me Bullgarinë në 17 tetor.