Rafael Leao është gati për një sezon të zjarrtë me Milanin dhe bën të ëndërrojnë tifozët kuqezinj. Në një intervistë për “Gazzeta Dello Sport”, portugezi shprehet se te ky Milan ndjehet një energji pozitive ndërsa shton se ai vetë ndjehet i karikuar për një sezon të madh.

“Më duhej një pushim në fundin e sezonit dhe kalova mirë me pushime, falë edhe miqve e familjes. Megjithatë, edhe gjatë kohës që isha me pushime jam stërvitur pak. Tani jam gati dhe i karikuar për një sezon të madh. Kam folur me trajnerin dhe me disa prej shokëve të skuadrës, ndjehet një energji shumë pozitive. Falenderoj edhe tifozët për mesazhet vlerësuese e motivuese që më dërgojnë çdo ditë”, u shpreh Leao.

Këtë vit, sulmuesi mban fanellën me numrin 10, të liruar nga Brahim Diaz, i cili u rikthye te Real Madrid : “Personalisht, dua të bëj mirë dhe të jap gjithçka, me këtë fanellë dhe me këtë numër të ri, brenda këtij klubi që e konsideroj tani si familjen time të dytë ”.

Kujtojmë se 24-vjeçari rinovoi këtë verë kontratën me Milanin duke firmosur me kuqezinjtë deri në vitin 2028, ndërsa italianët i besuan edhe numrin 10 teksa Leao është shndërruar në figurën kryesore të 19 herë Kampionëve të Italisë.