Lionel Scaloni nënshkruan kontratë të re si trajner i Argjentinës.

Trajneri fitues i Kupës së Botës ka zgjatur kontratën deri në vitin 2026 me përfaqësuesen bardhekaltër vetëm disa muaj pasi e çoi vendin e tij drejt lavdisë në Katar.

Lajmi u konfirmua përmes llogarisë zyrtare të Argjentinës në Twitter.

Scaloni, me triumfin në Katar, u bë trajneri i katërt më i ri në histori që ka fituar Kupën e Botës.

Edhe pse një trajner pa shumë përvojë, ai ia doli të bashkonte futbollistët rreth “yllit” të skuadrës, Lionel Messi, i cili kishte shansi e fundit për të fituar trofeen madhor, që ishte i vetmi që i mungonte palmaresit të tij.

Argjentina e nisi me një disfatë shokuese kundër Arabisë Saudite në ndeshjen hapëse në turneun aziatik, por u rikthye në mënyrë të jashtëzakonshme për të kaluar në finale, duke mposhtur Francën me penallti 4-2 pas një ndeshjeje dramatike.

Me ndihmën e Scalonit, Argjentina u hakmor për humbjen e trofeut në vitin 2014 dhe i dha fund një pritjeje 36-vjeçare për të ngritur edhe një herë Kupën e Botës.

Sfida e radhës për Scalonin do të jetë mbrojtja e kurorës në vitin 2026.