Një grua 98-vjeçare i është rikthyer dashurisë së saj për makinat e shpejta, duke arritur një shpejtësi prej 210 km/orë në një pistë garash.

Patricia Elliott, e pasionuar pas makinave sportive gjatë gjithë jetës, bëri një xhiro me një Aston Martin në pistën Thruxton Race Circuit, në Andover.

Ish-punonjësja e British Aerospace dhe banore e shtëpisë së kujdesit Dower House në Winchester nuk u mendua dy herë kur iu ofrua kjo mundësi.

Ajo tha:"Nuk besoj se në kohën time makinat kishin as 210 km/h të shënuara në shpejtësimatës.Kam jetuar mjaft gjatë, por kjo është një nga ato kujtime që do të më mbetet gjatë në mendje. Është diçka që nuk do ta harroj kurrë."

Sara Stagg, koordinatore e mirëqenies së banorëve në The Dower House, tha:"Ajo ka qenë gjithmonë një adhuruese e madhe e makinave sportive dhe, kur e pyetëm nëse do të donte ta përjetonte sërish këtë ndjesi, e pranoi menjëherë."

Kjo ditë e veçantë u bë edhe më domethënëse nga prania e kushërirës së Elliott, Susan, e cila udhëtoi nga Skocia për ta parë teksa zbriste në pistë.

Ajo tha:"Nuk u besuam syve kur morëm emailin ku thuhej se Patricia po mendonte të hipte sërish në një makinë garash në moshën 98-vjeçare. Është vërtet diçka e jashtëzakonshme.

"Por, në të njëjtën kohë, nuk u habitëm aspak. Kjo është tipike për Patrician!"

Elliott ishte një nga vetëm dy gratë që punonin në BritishAerospace gati 70 vjet më parë, pikërisht aty ku lindi edhe pasioni i saj për makinat.

Ajo kujton me nostalgji se i ati i dhuroi një makinë sportive WolseleyHornet për ditëlindjen e saj të 21-të, me të cilën transportonte kolegët për në punë dhe nga puna.

"Rruga kalonte nëpër rrugë fshati me shumë kthesa dhe kodra," tha ajo.

"Ne merrnim shpejtësi para se të ngjiteshim në një kodër, fiknim motorin dhe pastaj zbrisnim në anën tjetër pa ndezur motorin, për të kursyer karburantin."

Chris Golding, drejtori operativ i The Dower House, i cili mori pjesë në këtë aktivitet, tha:

"Ne jemi të përkushtuar t'i mbështesim banorët tanë që të vazhdojnë ta jetojnë jetën sa më plotësisht dhe në mënyrë sa më të pavarur.

"Sot ka qenë një ditë jashtëzakonisht e veçantë. Ishte kënaqësi ta shihnim zonjushën Elliott duke rijetuar diçka që e do me gjithë zemër.

"Dua gjithashtu të falënderoj ekipin e Thruxton Race Circuit, i cili bëri të mundur këtë përvojë në një mënyrë kaq të sigurt dhe të këndshme." /Inside Nova – Syri.net