Fshati Udënisht në Pogradec po përballet me mungesën e kanalizimeve funksionale dhe rrugë të degraduara, duke vështirësuar jetën e banorëve. Ujësjellësi i investuar nuk ofron ujë të pijshëm, pasi ndotja nga miniera pranë fshatit e bën të rrezikshëm për shëndetin. Banorët janë detyruar të përdorin burimet natyrore, ndërsa kërkojnë ndërhyrje urgjente nga institucionet.

Syri TV

Fshati Udënisht, në bashkinë e Pogradecit, po përballet me një sërë problematikash që po vështirësojnë jetën e përditshme të banorëve. Një ndër shqetësimet kryesore mbetet sistemi i papërfunduar i kanalizimeve të ujërave të zeza, i cili jo vetëm që nuk është funksional, por ka sjellë edhe dëmtime të konsiderueshme në rrugët kryesore dhe ato të brendshme të fshatit.

Banorët shprehen se ndërhyrjet kanë lënë pas rrugë të degraduara, duke e bërë lëvizjen të vështirë, sidomos gjatë stinës së reshjeve. Por problematikat nuk ndalen këtu. Edhe investimi në ujësjellës nuk po jep rezultatet e pritshme. Sipas banorëve, uji që furnizohet është i pakonsumueshëm dhe përbën rrezik për shëndetin.

Ata ngrenë shqetësimin se pranë fshatit ndodhet një minierë e cila ndikon në ndotjen e ujit, duke e përzier atë me minerale të dëmshme. Për këtë arsye, shumë familje janë detyruar të mos e përdorin ujin e rrjetit për konsum. Në mungesë të një zgjidhjeje, banorët e Udënishtit janë kthyer te burimet natyrore të fshatit për të siguruar ujë të pijshëm, një alternativë e vështirë dhe jo gjithmonë e sigurt. Ata kërkojnë ndërhyrje urgjente nga institucionet përkatëse për përfundimin e kanalizimeve, dhe garantimin e një furnizimi të sigurt me ujë të pijshëm.