Pas paralajmërimit të ekspertëve se deri në vitin 2040 mbi 220 milionë fëmijë mund të jenë obezë, një gjë bëhet gjithnjë e më e qartë: zakonet e të ushqyerit krijohen shumë herët.

Fëmijët shpesh refuzojnë ushqimet e shëndetshme dhe preferojnë alternativa më të ëmbla ose më të përpunuara. Por me disa strategji të vogla dhe të përditshme, prindërit mund t’i ndihmojnë ata të krijojnë një marrëdhënie më të mirë me ushqimin dhe zakone që do t’i shoqërojnë gjatë gjithë jetës.

10 mënyra të thjeshta për t’i mësuar fëmijët të hanë më shëndetshëm

1. Modifikoni pjatat që ata duan

Në vend që t’u hiqni ushqimet e preferuara, provoni t’i bëni më të shëndetshme. Për shembull, mund të shtoni perime në një pjatë makaronash ose të përdorni përbërës më të mirë për një recetë që ata e duan.

2. Bëjeni ushqimin argëtues

Forma dhe prezantimi bëjnë diferencë për fëmijët. Pritini frutat në forma interesante ose krijoni pjata me ngjyra dhe figura që i bëjnë më kuriozë për të provuar shije të reja.

3. Përdorni personazhet që ata pëlqejnë

Fëmijët frymëzohen nga heronjtë e tyre. Në vend që të thoni “Duhet ta pish qumështin sepse të bën mirë”, mund t’u thoni:
“A e di që Batman-i e pëlqen shumë qumështin? Prandaj është kaq i fortë.”

4. Përfshijini në gatim

Fëmijët kanë më shumë gjasa të provojnë ushqimet që kanë ndihmuar t’i përgatisin vetë. Lërini të lajnë perimet, të përziejnë përbërësit ose të zgjedhin disa produkte në supermarket.

5. Mbani gjithmonë gati opsione të shëndetshme

Kur fëmijët kthehen nga shkolla apo aktivitetet sportive janë zakonisht shumë të uritur. Nëse në frigorifer kanë fruta të prera, kos ose snack-e të shëndetshme, ka shumë më tepër gjasa që të zgjedhin ato.

6. Shtoni perime në mënyrë kreative

Perimet mund të shtohen lehtësisht në smoothie, në salca ose në pjata të tjera. Mund t’i prisni shumë imët në mënyrë që të bëhen pjesë e ushqimit pa u vënë re menjëherë.

7. Flisni pozitivisht për ushqimin

Fëmijët imitojnë shumë prindërit. Në vend që t’i urdhëroni të hanë diçka, tregoni entuziazëm për ushqimin: “Sa e shijshme duket kjo!”

8. Mos e përdorni ushqimin si formë shpërblimi

Dhënia e një ëmbëlsire si shpërblim që fëmija të konsumojë fruta apo perime do të krijojë një lidhje të keqe me ushqimin. Pas një vakti të shëndetshëm provoni të ofroni fruta në forma të pëlqyeshme për fëmijët.

9. Mos i detyroni

Presioni për të ngrënë mund të ketë efektin e kundërt. Lërini fëmijët të eksplorojnë ushqimet me ritmin e tyre dhe t’i provojnë kur të ndihen gati.

10. Mos u dorëzoni nëse refuzojnë

Mund të duhen deri në 15 herë që një fëmijë të pranojë një ushqim të ri. Kjo është normale, ndaj vazhdoni t’i ofroni alternativa pa i detyruar.

Ushqimi i shëndetshëm është një nga dhuratat më të rëndësishme që mund t’i bëni fëmijës suaj. Me pak durim dhe kreativitet, zakonet e mira ushqimore mund të bëhen pjesë natyrale e jetës së tyre.