Shprehja "six-seven", e cila i solli Sër Keir Starmerit një vërejtje gjatë një vizite në shkollë, është shpallur nga Oxford University Press (OUP) si fjala e vitit në zhargonin e fëmijëve.

Shprehja fituese, "six-seven", u bë virale në rrjetet sociale në vitin 2025 dhe u kthye në dhimbje koke për mësuesit. Ajo nuk ka një kuptim të caktuar, por duket se u përhap fillimisht nga përsëritja e saj në një këngë rap me titullin Doot Doot (6 7).

Kryeministri u përfshi në këtë trend në Welland Academy në Peterborough, ku udhëhoqi nxënësit në një vallëzim në TikTok të lidhur me shprehjen. Ai kërkoi me shaka ndjesë ndaj drejtoreshës Jo Anderson, pasi ajo i tha se "fëmijët ndëshkohen për përdorimin e kësaj fjale në shkollën tonë".

OUP tha se "six-seven", që shpesh shoqërohet me një gjest me të dyja duart sikur po peshon diçka, "tregon sa fleksibël është gjuha, kur dy numra bashkohen për të krijuar një fjalë të re, por që është e vështirë të përkufizohet".

Shprehja, e përdorur shpesh si përgjigje ndaj pyetjeve për orën ose numrat, është kthyer në një shaka të brendshme për Brezin Alpha (ata të lindur pas vitit 2010), pikërisht sepse nuk ka kuptim. Sipas OUP, fakti që mund të bezdisë prindërit dhe mësuesit duket se është pjesë e tërheqjes së saj.

Gati gjysma (47%) e fëmijëve të anketuar nga forumi kërkimor arsimor i OUP-së e zgjodhën "six-seven" si fjalën e vitit në zhargon për 2025.

Në vendin e dytë doli "aura", që i referohet "aureolës ose energjisë së veçantë që rrethon dikë", ndërsa në vendin e tretë "delulu", një shkurtim i fjalës "deluzionues".

Lista e vitit të kaluar përfshinte edhe "skibidi", një tjetër term viral që përdoret nga të rinjtë dhe mund të nënkuptojë "cool", "i keq" ose "i çuditshëm", por pa një kuptim të qëndrueshëm.

Kritikët thonë se popullariteti i këtyre shprehjeve tregon një kulturë në rritje të "kalbëzimit të trurit" te fëmijët e varur nga përmbajtje interneti me cilësi të ulët. Të tjerë i shohin si shenja identiteti të padëmshme.

Trendi "six-seven" mendohet se ka nisur nga një këngë drill rap me titull Doot Doot (6 7), e publikuar në shkurt nga reperi amerikan Skrilla, ku numrat përsëriten vazhdimisht.

Ajo fillimisht u përhap mes tifozëve të basketbollit për të ngritur figurën e LaMelo Ball, lojtar 2.01 metra i gjatë i ekipit Charlotte Hornets në Karolinën e Veriut, përpara se të bëhej virale në internet dhe të përdorej gjerësisht edhe në shkolla.

Andrea Quincey, drejtoreshë e arsimit parashkollor dhe fillor në OUP, tha se nuk ishte surprizë që termi u bë i njohur te të rinjtë, si një arratisje lozonjare nga lajmet e përditshme.

Ndërkohë, Oxford University Press zgjodhi "peace" (paqe) si fjalën e përgjithshme të vitit për fëmijët në 2025, pasi u përzgjodh nga më shumë se një e treta e të anketuarve.

35% e afro 5000 fëmijëve në Mbretërinë e Bashkuar, nga mosha gjashtë deri në 14 vjeç, e zgjodhën atë si fjalën e vitit, e ndjekur nga 33% që zgjodhën "AI" dhe 21% që zgjodhën "resilience" (qëndrueshmëri).

OUP tha se zgjedhja kryesore ishte "qartazi e ndikuar nga mbulimi mediatik i konflikteve në botë, si në Ukrainë dhe Gaza", me një në 10 fëmijë që përmendën luftën si arsye.

Fitues të mëparshëm kanë qenë "ndryshimet klimatike", "Coronavirus", "Brexit" dhe "Trump".

Znj. Quincey tha:"Një temë kyçe që shohim nga kërkimi ynë është se sa të ndjeshëm janë fëmijët ndaj ngjarjeve aktuale. Këtë vit nuk është ndryshe, qoftë duke kërkuar paqe përballë konflikteve, apo duke treguar sa shumë ka hyrë inteligjenca artificiale në jetën e përditshme.

"Ndoshta nuk është çudi që 'six-seven' u zgjodh masivisht si fjala e vitit në zhargon. Është një fjalë që u sjell të qeshura, gëzim dhe i bën të lidhen me miqtë.

"Shohim sa e rëndësishme është që fëmijët të kenë kontroll mbi gjuhën e tyre, larg botës së të rriturve, dhe të ndajnë fjalë që të rriturit nuk i kuptojnë."