4-vjeçarja Ajsel Dervishi është në luftë për jetën prej 2 vitesh pasi vuan nga një sëmundje talasemike majore. Prindërit e saj bëjnë apel për ndihmë, që Ajsel të kryejë një transplant të palcës së kockës në Turqi, pasi vendi i saj i lindjes, Shqipëria, nuk i ofron asnjë mundësi për trajtim.

Në një kohë që PPP-të në shëndetësi vazhdojnë të shkaktojnë gjakderdhje financiare dhe projekti më ambicioz i kësaj qeverie është ndërtimi i një hoteli në QSUT, shëndetësia falas vazhdon të kushtojë shtrenjtë për shqiptarët, që e vetmja shpresë kanë solidaritetin.

Ajsel Dervishi është 4-vjeçarja që sot përballet me pasojat e një sëmundjeje të rëndë të gjakut. Ajo prej 2 vitesh vuan nga talasemia drepanocitoze, një sëmundje që i shkakton dhimbje të gjymtyrëve, dhimbje barku, ulje të hemoglobinës dhe shumë probleme të tjera, të cilat mund të çojnë deri në dëmtimin e organeve të brendshme. Për shkak të gjendjes së saj, Ajsel detyrohet të marrë shpesh transfuzione gjaku, gjë që është shumë e vështirë për një fëmijë të kësaj moshe.

Mjekët kanë rekomanduar që Ajseli të kryejë një transplant të palcës së kockës, një trajtim i specializuar që nuk ofrohet në vendin tonë. Në këtë rast, Turqia është mundësia më e mirë për shpëtimin e jetës së saj, pasi atje ndodhet ekipi dhe infrastruktura mjekësore e duhur.

Prindërit e Ajselit kanë hapur një GoFundMe ku tashmë ka filluar mbledhja e parave. Ata bëjnë apel që çdo shqiptar që ka mundësi të kontribuojë, t’i ndihmojë ata të arrijnë shumën e nevojshme për transplantin. Në faqen e website-it të SyriTV, Syri.net, mund të gjeni një link që ju çon drejtpërdrejt në hapësirën e krijuar për Ajsel në platformën GoFundMe.