Edhe ndryshimi më i vogël e shqetëson organizmin, si të përgatitemi për zhvendosjen e kohës prapa

Natën midis të shtunës dhe të dielës, më 25 dhe 26 tetor, fillon ora dimërore – akrepat zhvendosen nga ora tre në orën dy pas mesnate. Kjo do të thotë se do të flemë një orë më gjatë, por dita do të errësohet më herët.

Edhe pse ndryshimi është vetëm një orë, trupi ynë e ndien këtë kalim. Sipas hulumtimeve, përshtatja me ritmin e ri mund të zgjasë deri në dy javë.

Ekspertët theksojnë se ndryshimi i orës ndikon si tek personat e shëndetshëm, ashtu edhe tek ata që kanë sëmundje kronike apo vështirësi mendore.

“Në popullatën e shëndetshme mund të shfaqen çrregullime të gjumit, përgjumje gjatë ditës, nervozizëm, përqendrim i reduktuar dhe lodhje. Këto ndikojnë në efikasitetin në punë dhe është vërejtur se pas zhvendosjes së orës mund të ketë më shumë aksidente trafiku dhe ulje të produktivitetit”, shpjegojnë specialistët.

Rekomandohet që disa ditë para ndërrimit të orës, njerëzit të përpiqen të përshtatin gradualisht orarin e gjumit, të shmangin aktivitetet e lodhshme dhe të konsumojnë ushqime të lehta me shumë lëngje. Të dielën, pas ndryshimit të orës, është mirë të kalohet më shumë kohë në dritën natyrale të ditës.

“Ndryshimet e motit dhe të stinës mund të jenë faktorë shtesë stresi, sidomos për personat që kanë ndjeshmëri më të lartë psikologjike, dhe mund të ndikojnë në përkeqësimin e gjendjes së tyre,” theksojnë mjekët.

Fëmijët dhe adoleshentët më të ndjeshëm ndaj ndryshimit

Adoleshentët, të cilët shpesh kanë një ritëm të çrregullt gjumi për shkak të stilit të jetesës, mund të ndiejnë lodhje, mungesë përqendrimi dhe nervozizëm pas kalimit në orën dimërore, çka ndikon edhe në mësime dhe fokus.

Pacientët kronikë kërkojnë kujdes të veçantë

Tek personat me sëmundje kronike ose me çrregullime mendore, edhe ky ndryshim i vogël mund të shkaktojë humbje të rutinës dhe përkeqësim të simptomave. Prandaj është e rëndësishme që të ruhet orari ditor dhe të respektohet struktura e zakonshme e ditës.

A duhet të hiqet ndryshimi i orës?

Diskutimi për heqjen e ndryshimit sezonal të orës vazhdon prej vitesh, por ende nuk ka një vendim të unifikuar nëse duhet të mbetet ora verore apo ajo dimërore. Disa studime sugjerojnë se koha verore është më e përshtatshme për ritmet biologjike, ndërsa të tjerë mbështesin kohën dimërore si më natyrale për organizmin.

Në përfundim, specialistët këshillojnë:

“Dëgjoni ritmin tuaj të brendshëm, ngadalësoni dhe përpiquni të jetoni në harmoni me natyrën. Trupi ka nevojë për diell, pushim dhe durim për t’u përshtatur me çdo ndryshim.”