Në Vatikan kanë mbërritur 164 delegacione shtetesh dhe përfaqësues të besimeve të ndryshme fetare, të cilët do të marrin pjesë në ceremoninë e varrimit të Papa Françeskut. Mbrëmjen e kaluar, në orën 20:00, në Altarin e Rrëfimit në Bazilikën e Shën Pjetrit, u zhvillua riti i mbylljes së arkivolit të Papës së ndjerë. Ceremonia u drejtua nga Kardinali Camerlengo dhe Mjeshtri i Festimeve Liturgjike, i cili lexoi aktin zyrtar që u vendos brenda arkivolit në fund të kremtimit.

Në këtë moment solemn morën pjesë edhe disa anëtarë të familjes së Papa Françeskut. Riti u zhvillua sipas përshkrimeve të “Ordo Exsequiarum Romani Pontificis”, duke respektuar traditën e varrimit të papëve në Kishën Katolike. Gjatë gjithë natës, pranë trupit të Papës, besimtarët vijuan lutjet deri në përgatitjet për Meshën e Shenjtë të mëngjesit të sotëm.

Sipas Zyrës së Shtypit të Vatikanit, në ceremoninë e varrimit do të jenë të pranishëm presidentë, kryeministra dhe drejtues të institucioneve botërore e europiane. Po ashtu, do të marrin pjesë përfaqësues të komuniteteve të ndryshme fetare. Kishën Ortodokse Autoqefale të Shqipërisë do ta përfaqësojnë Shkëlqesia e Tij Anastas, Kryepeshkop i Tiranës, Durrësit dhe i gjithë Shqipërisë.