Qytetarët e Orikumit në Vlorë protestuan sot lidhur me premtimet e pambajtura nga qeveria. Sipas qytetarëve, qeveria i ka mashtruar dhe të gjitha premtimet kanë qenë gënjeshtra. Sipas tyre, nuk ka investime për këtë zonë. Zona e Orikumit ka problem me dritat dhe ujin, edhe pse është një zonë turistike dhe e frekuentuar nga shumë turistë. Protesta e banorëve të Orikumit është mbështetur edhe nga PD.

Ndërkohë, Ministri i Infrastrukturës dhe Energjisë, Damian Gjiknuri ishte sot për inspektim në një zonë të Orikumit, në kantierin e hapur atje ku tanimë, sipas tij, është drejt përfundimit nënstacioni i ri elektrik.

“Nënstacioni do bëjë të mundur përmirësimin e furnizimit me energji të të gjithë zonës së Orikumit ku efekti do të jetë i menjëhershëm me lidhjen që do të ketë rrjeti 35 kV. Janë investime të nevojshme për këtë zonë turistike”, tha ndër të tjera Gjiknuri.