Pse shkaktojnë statinat dhimbje muskujsh?

Statinat janë ndër barnat më efektive për uljen e kolesterolit dhe reduktimin e rrezikut të sëmundjeve të zemrës. Megjithatë, për disa pacientë ato shkaktojnë dhimbje, dobësi muskulore dhe ulje të aftësisë për të bërë aktivitet fizik, duke i detyruar të ulin dozën ose të ndërpresin trajtimin.
 
Një studim i ri nga Universiteti McMaster në Kanada mund të shpjegojë pse ndodh kjo. Studiuesit zbuluan se statinat nuk ndikojnë vetëm në prodhimin e kolesterolit në mëlçi, por edhe në proceset që u mundësojnë qelizave të muskujve të prodhojnë dhe përdorin energji.
 
Sipas studimit, kur ky proces prishet, qelizat muskulore përjetojnë stres metabolik. Ky stres aktivizon sistemin imunitar brenda vetë muskujve, duke shkaktuar inflamacion dhe dëmtim të indeve. Kjo mund të jetë arsyeja pse disa pacientë përjetojnë efekte anësore muskulore.
 
Simptomat e lidhura me statinat prekin rreth 7 deri në 29 për qind të përdoruesve. Edhe pse mjekët e dinin prej kohësh se këto barna mund të shkaktonin probleme muskulore, mekanizmi i saktë kishte mbetur i paqartë.
 
Studiuesit analizuan qeliza muskulore dhe modele te minjtë. Kur bllokuan reagimin imunitar të shkaktuar nga statinat, dëmtimi i muskujve u zvogëlua ndjeshëm. Kjo sugjeron se efektet anësore nuk janë të lidhura drejtpërdrejt me mekanizmin që ul kolesterolin.
 
Sipas profesorit Jonathan Schertzer, një nga autorët e studimit, ky është një zbulim premtues, sepse tregon se në të ardhmen mund të zhvillohen trajtime që parandalojnë dëmtimin e muskujve pa ulur përfitimet që statinat kanë për zemrën.
 
Megjithëse rezultatet janë ende në fazat e hershme dhe nevojiten studime të tjera te njerëzit, ato hapin rrugën për zhvillimin e terapive të reja. Nëse konfirmohen, pacientët që nuk i tolerojnë statinat mund të përfitojnë nga barna që mbrojnë muskujt, duke u mundësuar të vazhdojnë trajtimin kundër kolesterolit të lartë pa vuajtur nga efektet anësore. / Scitech Daily – Syri.net