Studimi: Inteligjenca Artificale mund të zbulojë shenjat e hershme të kancerit të fytit përmes një regjistrimi të thjeshtë zëri

Një studim i ri i publikuar në Frontiers in Digital Health sugjeron se inteligjenca artificiale (IA) mund të përdoret për të analizuar regjistrime të shkurtra zëri dhe të zbulojë anomali në kordat vokale, që variojnë nga nyjet beninje deri te fazat e hershme të kancerit të laringut.

Sipas studiuesve, kjo qasje mund të bëjë të mundur një metodë më të shpejtë, të përballueshme dhe të lehtë për diagnostikimin e hershëm të sëmundjes, duke shmangur procedurat invazive si endoskopitë dhe biopsitë.

Ekipi i udhëhequr nga Phillip Jenkins, studiues postdoktoral në Universitetin e Shëndetit dhe Shkencës së Oregonit, analizoi rreth 12,500 regjistrime nga 306 persona në Amerikën e Veriut. Ata zbuluan se IA ishte në gjendje të identifikonte ndryshime akustike delikate, si raporti harmonik-zhurmë dhe lartësia e tonit, sidomos tek burrat me lezione ose kancer në kordat vokale.

Kanceri i laringut prek mbi një milion njerëz në botë çdo vit dhe vret rreth 100 mijë. Shkalla e mbijetesës varet nga koha e diagnostikimit, duke variuar nga 35% në 90%. Shenjat paralajmëruese përfshijnë ngjirjen e zërit për më shumë se tre javë, dhimbje të vazhdueshme të fytit, vështirësi në gëlltitje dhe gunga në qafë.

Studiuesit thonë se me grupe të dhënash më të mëdha dhe validim klinik, një mjet i tillë mund të hyjë në testim pilot brenda dy viteve të ardhshme, duke hapur rrugën për zbulimin e hershëm të kancerit përmes një regjistrimi të thjeshtë zëri.