Autokratët janë të ngjashëm dhe për këtë nuk ka asnjë dyshim!

Kryeministri shqiptar, Edi Rama ngjan me presidentin serb, Aleksandër Vuçiç.

SYRI ka faktuar edhe në të shkuarën se edhe stilin e propagandës e kanë të njëjtë.

Së fundmi, një njoftim nga kompania gjigante META, ka zbuluar se Vuçiç dhe Rama veprojnë njësoj edhe kur bie fjala për profilet false në median sociale.

META bëri me dije se ka mbyllur shumë profile false të mbështetësve të Vuçiçit. Përmbajtja e këtyre profileve arrinte në qindra-mijëra njerëz. Rrjeti i profileve, i lidhur me punonjësit e Partisë Progresive Serbe të Vuçiçit, përpiqej që të krijonte një perceptim për një mbështetje të gjerë për Presidentin e Serbisë.

Gazeta kroate Jutarnji List shkruan se llogaritë pro-qeveritare janë çaktivizuar në Serbi, Kubë dhe Bolivi. Ato përdoreshin për të diskredituar opozitën.

Këto llogari funksionin në mënyrë të pavarur nga njëra-tjetra në secilin vend dhe përmbajtja e tyre arrinte në qindra mijëra njerëz. Ato u zbuluan pas një hetimi të brendshëm nga kompania META. Secila llogari operonte në platforma të shumta të medieve sociale, duke përfshirë këtu Facebook, Instagram dhe WhatsApp.

Në Kubë, këto llogari të rreme, me fotografi profili të gjeneruara nga Inteligjenca Artificiale, publikonin përmbajtje në një sërë platformash, duke përfshirë meme për figurat e opozitës dhe kritikët e qeverisë, duke i quajtur ata ‘krimba’, një term përçmues që përdoret nga qeveria për disidentët.

META bëri të ditur në një deklaratë se qëllimi i këtyre profileve ishte ‘krijimi i një perceptimi për mbështetje të gjerë dhe autentike për presidentin serb, Aleksandër Vuçiç dhe Partinë Progresive Serbe’.

Kompania META, e njohur më përpara me emrin Facebook, është nën kritika se ka lejuar përhapjen e propagandës, dezinformacioneve dhe gjuhës së urrejtjes përmes platformave të saj.