Protesta kombëtare kundër qeverisë vijon edhe këtë të shtunë, duke hyrë në ditën e saj të 42-të. Organizatorët kanë njoftuar se në tubimin e sotëm do t'u bashkohen edhe shqiptarë nga diaspora, të cilët prej kohësh kanë shprehur mbështetjen për këtë kauzë.

Kërkesa kryesore e protestuesve mbetet dorëheqja e kryeministrit Edi Rama. Organizatorët kanë bërë thirrje për pjesëmarrje të gjerë, duke theksuar se protestat do të vazhdojnë deri në plotësimin e kërkesave të tyre.

Një ditë më parë, protestuesit marshuan në disa prej akseve kryesore të Tiranës, duke brohoritur slogane si "Qeveri e krimit", "Shqipëria kërkon revolucion" dhe "Rama jep dorëheqjen".

Marshimi kaloi edhe në Rrugën e Kavajës, ndërsa protestuesit u ndalën për disa minuta në hyrje të zonës së njohur si Rruga e Ambasadave.

Gjatë tubimit, pjesëmarrësit hodhën akuza ndaj qeverisë për korrupsion dhe kërkuan ndryshime politike, ndërsa protesta pritet të vijojë edhe gjatë ditës së sotme me pjesëmarrjen e qytetarëve dhe përfaqësuesve të diasporës.