Institucionet evropiane dhe përfaqësuesit e tyre po shfaqin gjithnjë e më shumë rezerva ndaj qeverisjes në Shqipëri, duke ngritur alarmin për sundimin e ligjit dhe mbrojtjen e mjedisit. Vula Tsetsi, bashkëkryetare e Të Gjelbërve Evropianë, ka ndarë gjatë një interviste me Flavio Qarrin në “Kafe Shqeto”, në syri tv, detaje nga një vizitë intensive në Tiranë, duke bërë thirrje për një vëmendje të shtuar mbi atë që po ndodh me procesin e integrimit të vendit në BE.

Sipas zyrtares evropiane, situata aktuale nuk ka të bëjë thjesht me një mosbesim ndaj institucioneve, por me nevojën urgjente që zëri i qytetarëve në rrugë të dëgjohet. Kërkesat e qytetarëve për transparencë, pjesëmarrje në vendimmarrje dhe mbrojtje të natyrës konsiderohen jetësore për një proces të drejtë anëtarësimi. Kritikat më të ashpra nga Brukseli përqendrohen te premtimet e qeverisë shqiptare për një integrim të shpejtë, një retorikë që bie ndesh me realitetin e zbatimit të standardeve evropiane dhe legjislacionit mjedisor.

Një pikë kyçe e diskutimit është ligji kontrovers për investimet strategjike. Evropa kërkon anulimin e këtij ligji, i cili shihet si një rrezik madhor që cenon rëndë si mbrojtjen e mjedisit ashtu edhe të drejtën e pronës. Zyrtarët evropianë e cilësojnë thellësisht alarmante tendencën për të ngritur ndërtime ilegale dhe komplekse të turizmit masiv në mes të zonave të mbrojtura. Praktika e "shitjes së vendit te miliarderët" është etiketuar si e papranueshme për një shtet që aspiron të jetë pjesë e Bashkimit Evropian në vitet e ardhshme, duke theksuar se standardet e dyfishta nuk do të tolerohen.

Flavio Qarri: Duket se politikanët e të gjithë Evropës, të të gjitha krahëve, kanë një konsensus të rrallë ashtu siç ka ndodhur rrallë edhe me shqiptarët që me sa duket Edi Rama nuk ofron më garanci. Paraskevi, Vula, Ceca, e cila është bashkëkryetare e Të Gjelbërve Evropianë, është me ne në këtë mëngjes.

Vula Tsetsi: Është e vërtetë, përshëndetje. Gjithçka është në rregull. Në fakt, ne sapo u kthyem dje në Bruksel nga Tirana, pas një udhëtimi mjaft intensiv. Ishte një përvojë e mbushur me emocione, sepse kjo eksperiencë ka qenë shumë e rëndësishme dhe me ndikim për familjen tonë politike. Ne kuptuam se institucionet evropiane mbajnë një përgjegjësi të madhe për të siguruar që Shqipëria të ketë një rrugë të qartë drejt integrimit evropian, por njëkohësisht duhet të respektohen edhe shteti i së drejtës dhe mbrojtja e mjedisit.

Flavio Qarri: Do të doja të bëja një dallim, mes asaj që thatë dhe këndvështrimit tonë. Që nuk është çështje mosbesimi dhe mosrespekti ndaj institucioneve të Shqipërisë.

Vula Tsetsi: Nuk besoj se kjo është çështje mosbesimi apo mungese respekti ndaj institucioneve të Shqipërisë. Është çështje e sigurimit që shteti i së drejtës të mbrohet, që zëri i qytetarëve të dëgjohet dhe që mesazhi që njerëzit po japin në rrugë të merret seriozisht: ata kërkojnë transparencë, kërkojnë pjesëmarrje, duan që natyra e tyre të mbrohet dhe kërkojnë një proces të drejtë drejt integrimit evropian.

Flavio Qarri: Prioriteti ynë në fakt, sa i takon këndvështrimit tonë, është sigurisht jo mosbesim ndaj institucioneve shqiptare, por mbi të gjitha domosdoshmëria që qytetarët në shesh të dëgjohen, procesi të jetë transparent, dhe sigurisht edhe nga mbrojtja e natyrës deri te procesi i anëtarësimit që të bëhet me transparencë. And Ms. Tsetsi?

Vula Tsetsi: Po, nuk mund të kemi standarde të dyfishta. Fakti që zoti Edi Rama premton se procesi i integrimit evropian do të ecë me shpejtësi, sjell edhe detyrime nga ana e tij. Ai duhet të respektojë plotësisht acquis communautaire (legjislacionin e Bashkimit Evropian), të zbatojë në tërësi legjislacionin mjedisor dhe t'i japë fund ligjit për investimet strategjike, i cili dobëson mekanizmat e mbrojtjes së mjedisit.

Pikërisht për këtë arsye ai ligj duhet të shfuqizohet. Por më lejoni të them edhe diçka tjetër: kur bëhet fjalë për një zonë të mbrojtur, pavarësisht se kujt i përket prona, ajo duhet të mbetet e mbrojtur. Për ne, problemi kryesor është se në mes të një parajse natyrore po tentohet të ndërtohen objekte të paligjshme dhe të zhvillohet turizëm masiv, duke e shitur vendin te miliarderët. Nuk dua ta thjeshtoj tepër çështjen, por kjo është e papranueshme. Nuk është e mundur që një gjë e tillë të ndodhë në një vend që pritet t'i bashkohet Bashkimit Evropian brenda pak vitesh.