SYRI TV/ Integrimi përplas maxhorancën me opozitën në kuvend, Debate të ashpra mes Nokës e Ballës

Me debate dhe tensione të ashpra mes opozitës dhe maxhorancës është shoqëruar seanca plenare në Kuvend, ku nuk munguan përplasjet fizike dhe intimidimet ndaj grave deputete të PD. Niko Peleshi i hoqi fjalën sekretarit të Përgjithshëm të PD, Flamur Noka, në Kuvend, çka solli bllokimin e foltores nga ligjvënësit demokratë, teksa Taulant Balla nuk kurseu kërcënimet ndaj deputetes Elda Hoti. Noka akuzoi Ballën si ushtar të Ramës dhe të krimit, ndërsa më herët pati përplasje e debate të ashpra për procesin e integrimit dhe shkeljen e rregullores në Kuvend, mes Gazmend Bardhit dhe Niko Peleshit. Opozita akuzoi Ballën se provokoi duke përmendur dëshmitarët e 2 prillit në Kuvend, teksa kërkoi përjashtimin e tij nga seanca.

Nga Syri TV
Është shoqëruar me tensione e përplasje të ashpra mes maxhorancës dhe opozitës seanca plenare në Kuvend. Akuzat e deputetëve të opozitës drejtuar kryetarit të parlamentit, Niko Peleshi, dhe kreut të grupit parlamentar të PS, Taulant Balla, nxitën debate të ashpra, teksa kulmi i tyre u shënua kur Peleshi i ndërpreu fjalën në foltore sekretarit të përgjithshëm të PD, Flamur Noka. Deputetët demokratë bllokuan foltoren në shenjë revolte, ndërsa Taulant Balla u përplas me deputeten Elda Hoti, duke mos kursyer intimidimet ndaj saj.

Pas përplasjeve, me urdhër të Ballës, Peleshi ndërpreu për disa minuta seancën.

Mollë sherri e debateve që përfshinë Taulant Ballën me Flamur Nokën ishte procesi i integrimit në BE dhe rreziku që kanoset nga vendimi i specialistëve për të bllokuar drejtësinë për të mbrojtur Ballukun. Teksa Balla mohoi akuzat e kërcënimit të integrimit, Noka e cilësoi këtë të fundit ushtar të Edi Ramës dhe të krimit.

Më herët, pikërisht për këtë çështje, por edhe për shkeljet në rregulloren e Kuvendit, sa i takon projekt-rezolutave dhe mocioneve me debat, u përplasën në foltore edhe kreu i grupit parlamentar të PD, Gazmend Bardhi, me Niko Peleshin.

Debate pati edhe për 2 prillin, ku Taulant Balla kërkoi një minutë heshtje në Kuvend, duke përmendur edhe emrat e dëshmorëve, gjë që u cilësua nga deputetët e opozitës si një provokim i ulët dhe politikë me viktimat e kryengritjes.