SYRI TV/ Rama shpërblen dhunën e policisë në protesta, paralajmëron rritje page për policët

Kryeministri Edi Rama ka shpërblyer me rritje page punonjësit e policisë, pas dhunës brutale të Policisë së Shtetit, në protestën e  20  shkurtit. Ndërsa njoftoi rritje page për 720  punonjës policie, Rama u shpreh i vendosur për të vijuar edhe me projektin e rrjetëzimit të qendrës së qytetit të Durrësit, pavarësisht protestave të banorëve që do të humbin shtëpitë e tyre. 

Syri TV

Dy ditë pas dhunës brutale në protestën e opozitës, Kryeministri Edi Rama, ka shpërblyer punonjësit e policisë së shtetit që dhunuan brutalisht protestuesit  dhe sulmuan me gaz lotsjellës qytetarët duke paralajmëruar rritje page për ta. Gjatë podcastit të tij ‘Flasim’, shefi i qeverisë argumentoi rritjen e pagës për forcat RENEA, forcat operacionale dhe forcat kombëtare të sigurisë, me justifikimin që ata shërbejnë në vijën e parë të rrezikut.

Rama ka tjetërsuar edhe progres raportin e Parlamentit Europian, duke e cilësuar si një vlerësim për Shqipërinë, megjithëse ky raport ngrinte shqetësimin për nivelin e lartë të korrupsionit, ndërhyrjet politike në sistemin e drejtësisë dhe problematikat me shitblerjen e votës në zgjedhje.

Ashtu si para një jave, kryeministri ka bërë të ditur që do të vijojë punën me projektin e shumëkundështuar TID, pavarësisht protestave të qytetarëve të Durrësit, të cilat do të humbin shtëpitë e tyre nga ky projekt.