Akuza mazhorancës/ Strazimiri: Doni të mbani edhe Ramën me Belindën edhe SPAK, njëri prej tyre do vdesë sot…

Në një fjalim të ashpër në Kuvend, deputeti i opozitës, Gent Strazimiri, ka akuzuar kryesinë e parlamentit për shkelje të Kushtetutës dhe zvarritje të qëllimshme të kërkesës së prokurorisë për arrestimin e Belinda Ballukut.

Strazimiri argumentoi se kërkesa është mbajtur peng për dy muaj e gjysmë, në kundërshtim flagrant me detyrimin ligjor për shqyrtimin e saj të menjëhershëm.

Sipas tij, rregullorja e Kuvendit dhe Kushtetuta e përcaktojnë qartë se kur prokuroria kërkon heqjen e imunitetit për një anëtar të qeverisë, çështja duhet të shqyrtohet “menjëherë”. Ai ironizoi çdo justifikim për vonesën, duke thënë se “menjëherë” do të thotë maksimumi të pritet deri ditën e hënë nëse kërkesa vjen në fundjavë, “jo dy muaj e gjysmë as tre”.

Në fjalën e tij, deputeti i vuri mazhorancës përpara një ultimatumi të prerë: ose të pranojë se prokurori po bën persekutim politik ndaj zëvendëskryeministres, ose të japë lejen për arrestimin e saj. Ai e krahasoi situatën me atë të një “shteti normal”, ku sipas tij, një zyrtar nën hetim do të shkarkohej “në sekondë” për t’u përballur me drejtësinë.

Strazimiri deklaroi se mazhoranca po përpiqet të mbajë gjallë njëkohësisht “Edi Ramën me Belindën” dhe “SPAK-un, veprën e artit që keni bërë në reformën në drejtësi”. Sipas tij, kjo është e pamundur. “Njëri prej tyre do vdesë sot. Të dyja bashkë nuk mund të jetojnë,” tha ai.

Gent Strazimiri: Zoti kryetar, proceduralisht ke dy muaj e gjysmë që je në shkelje të kushtetutës dhe të rregullores së kuvendit. Ka ardhur një kërkesë nga prokuroria për të arrestuar.

Do të thotë, kur vjen kërkesë nga prokuroria për të arrestuar një anëtar të kabinetit qeveritar i cili gëzon imunitetin që ka deputeti, ti duhet ta marrësh në shqyrtim menjëherë. Në qoftë se diskutojmë çfarë është menjëherë, është, mund të jetë logjikisht, nëse bie e shtunë, bie e diela duhet të presim të hënën. Jo dy muaj e gjysëm as tre. Në një kohë kur afatin gjithë e gjithë e ke tre muaj, nëse nuk kthen përgjigje do të thotë kërkesa ka rënë. Të thuash po mendohem se a mund të ndërhyjë apo s'mund të ndërhyjë te qeveria, prokuroria dhe drejtësia dhe pastaj do të marr vendim, është një gjë që kjo është nonsens, kjo fyen inteligjencën e shqiptarëve. Ndërhyn, ç'ke me të prokuroria tek gjyqësori. I ve hekurat. E ke me kushtetutë, e ke me rregullore të kuvendit. Nuk ka imunitet anëtari i Këshillit të Ministrave në vetvete përveçse asaj që Kushtetuta i njeh deputetit.

Brenda seancës duhet të vijë këtu dhe të merret vetëm një vendim. Këtë ka detyrë ky parlament të bëjë. Mos ndoshta prokurori kërkon të persekutojë politikisht zëvendëskryeministren e vendit? Në qoftë se nuk ka prova të tjera që po kërkon ta persekutojë politikisht, i jepet leja, i jepet leja t'i vejë hekurat.

Në çdo shtet normal, çdo qeveri, në momentin kur një prej anëtarëve të kabinetit, i bie qeleshja tek prokuroria, në sekondë e shkarkon vetë...

Goxha juristë marrin shkruajnë budallëqe te kodi i procedurës, te kodi i procedurës penale. A ndërhyn apo s'ndërhyn dot drejtësia? Ndërhyn, ç'ke me të, i vë hekurat. E ke me Kushtetutë. Ti ke vetëm një detyrim, ta marrësh menjëherë këtu, të keni kurajën të thoni, kjo po persekutohet politikisht nga prokuroria, që nga ai moment ai prokuror s'mund të jetë më në detyrë. Dy gjëra ka. Doni t'i mbani gjallë dhe Edi Ramën me Belindën, duke vazhduar të vjedhin, dhe SPAK-un, veprën e artit që keni bërë në reformën në drejtësi, t'i mbani të paprekura. Njëri prej tyre do vdesë sot. Për shkak të kësaj kërkese që ka bërë prokuroria. Të dyja bashkë nuk mund të jetojnë. Kështu që merrni, silleni në seancë. Riktheni kushtetutshmërinë e këtij kuvendi, silleni në seancë dhe kini kurajën t'i thoni jo prokurorisë...