Ministrat mungojnë në seancë/ 'Kumbaro mban në detyrë një abuzues fondesh', Zhupa: I keni dosjet gati për SPAK!

Në një seancë të tensionuar parlamentare, diskutimi mbi raportin vjetor të Kontrollit të Lartë të Shtetit, nxjerr në pah akuza të rënda për korrupsion dhe abuzim me fondet publike nga ana e qeverisë.

Deputetja e PD Ina Zhupa, në fjalën e saj, kritikoi ashpër mungesën e ministrave në sallë, duke e cilësuar raportin e KLSH-së, si të vetmin instrument që “skanon korrupsionin e qeverisë dhe abuzimet me paranë publike”.

Sipas deputetes, raporti zbulon se sektori me më shumë abuzime dhe më i nënfinancuari është ai i shëndetësisë. Ajo denoncoi një sërë problematikash të evidentuara nga KLSH, duke përfshirë mungesën e verifikimit të çmimeve të referencës, kontrolle fiktive dhe inventarë të pasaktë, të cilat, sipas saj, bëhen të gjitha “në kurriz të shëndetit të qytetarëve shqiptarë”. Zhupa theksoi se Ministrja e Shëndetësisë duhet të ishte prezente për të dhënë llogari për këto gjetje alarmante.

Akuzat nuk u ndalën me kaq. Vëmendja u zhvendos te Ministria e Arsimit, ku deputetja kërkoi përgjigje nga ministrja Mirela Kumbaro se përse vazhdon të mbajë në detyrë një sekretar të përgjithshëm, të cilin vetë KLSH e ka referuar për ndjekje penale si abuzues me fondet dhe procedurat.

Në shënjestër ishte edhe Ministria e Financave, e cila, sipas raportit të KLSH-së, ka dështuar në monitorimin e koncesioneve, duke lejuar abuzime me fondet publike. Zhupa argumentoi se mungesa e ministrave në këtë diskutim të rëndësishëm nuk është e rastësishme.

Nw përmbyllje tw fjalës sw saj, Zhupa tha se çdo raport i KLSH-së është një “skaner i të vërtetës”, dhe se gjetjet e tij përbëjnë dosje të mirëfillta për SPAK-un dhe për sistemin e drejtësisë.

“Të gjitha ato janë dosje për SPAK, janë dosje për drejtësinë, ku ministrat tuaj jo rrallëherë kanë nisur pikërisht procedurat nga kontrollet e Kontrollit të Lartë të Shtetit”, përfundoi ajo.

Unë e di që keni qejf t'ju shoh nga mbrapa, por nuk dua. Faleminderit kryetar. Nuk kam asnjë dëshirë t'ju shoh nga mbrapa. Më vjen mirë që hoqët dorë nga praktika e vjetshme ku kryetarin e KLSH-së e mbajtët për pesë ditë në kuvend të raportonte, sepse me sa duket ish-kryetari i atëhershëm i komisionit kishte çështje personale dhe kësaj radhe keni qenë brenda statuturës për ta bërë raportimin vetëm me një ditë në komisionin përkatës. Në fakt, ky është raportimi më i rëndësishëm kryetar, tani iku dhe ministri për parlamentin. Është më i rëndësishëm sepse është i vetmi që skanon korrupsionin e qeverisë dhe abuzimet me paranë publike. Dhe në këtë moment që ne flasim, ju nuk keni as atë ministrin për parlamentin, që në fakt ishte i vetmi që nuk auditohet, se nuk ka portofol dhe ndaj kishte kurajon për të qëndruar këtu.

Ndërkohë që këtu prezent duhet të ishte ministrja e shëndetësisë, e cila sipas asaj që referoi kryetari i KLSH-së edhe në komisionin përkatës, del që sektori më me shumë abuzime dhe i nënfinancuar është sektori i shëndetësisë, ku mungon që nga verifikimi i çmimit të referencës, tek kontrollet fiktive, tek inventarët e pasaktë dhe të gjitha këto në kurriz të shëndetit të qytetarëve shqiptarë.

Këtu duhet të ishte ministrja për procedurë. Këtu duhet të ishte ministrja e arsimit, zonja Kumbaro, për të thënë se pse vazhdon të mbajë sekretar të përgjithshëm të njëjtin person që KLSH-ja e ka çuar për ndjekje penale dhe e ka nxjerrë qartësisht që është abuzues i fondeve dhe i procedurave në Ministrinë e Arsimit. Këtu duhet të ishte ministri i financave, i cili në të gjitha raportet që nxjerr KLSH-ja për monitorimin e koncesioneve, nuk i kanë kryer detyrën dhe janë abuzues me fondet publike.

Por në këtë moment ju nuk keni ministrat, sepse e dini shumë mirë që çdo raport i bërë nga Kontrolli i Lartë i Shtetit është vetëm një skaner i të vërtetës dhe të gjitha ato janë dosje për SPAK, janë dosje për drejtësinë, ku ministrat tuaj jo rrallëherë kanë nisur pikërisht procedurat nga kontrollet e e Kontrollit të Lartë të Shtetit. Kjo ishte ndërhyrja ime. Shumë faleminderit.