Qindra media ndërkombëtare në Europë dhe SHBA po raportojnë së fundmi se parlamenti shqiptar i hapi rrugën marrëveshjes për të marrë mijëra azilantë nga Italia.
Marrëveshja 5-vjeçare është cilësuar kontroverse, raporton gazeta e madhe amerikane ‘Washington Post.
Sipas saj, Shqipëria nuk është një shtet i BE, prandaj marrëveshja cilësohet si kontroverse.
Ajo është kritikuar ashpër nga grupet e të drejtave të njeriut.
Kurse vetë Rama bëri një postim në anglisht ku mëson opozitarët në Europë se duhet të lënë grindjet e brendshme për çështjen e emigrantëve.
“Kuvendi ratifikoi sot marrëveshjen e bashkëpunimit kundër migracionit të paligjshëm ndërmjet Shqipërisë dhe Italisë! Shqipëria mbështet Italinë dhe vepron si një vend anëtar i BE-së, duke rënë dakord të ndajë një barrë që Evropa duhet ta përballojë e bashkuar si një familje, përballë një sfide që kapërcen ndarjet tradicionale të majta dhe të djathta.
Punojmë së bashku për të gjetur përgjigjet e duhura, pa e lënë këtë çështje të përdoret si lëndë djegëse për grindjet e brendshme politike që rrisin ankthin mes njerëzve të kontinentit tonë të përbashkët dhe e bën të ardhmen tonë kolektive më të pasigurt.
Asnjë vend nuk mund ta zgjidhë një sfidë të tillë i vetëm, asnjë retorikë apo zgjidhje e shpejtë nuk mund të zvogëlojë vështirësinë e kësaj sfide dhe asnjë lavdi e vjetër apo mënyrë demode e të menduarit nuk mund të na shpëtojë nga përballja me atë që po vjen në të gjitha frontet. Vetëm një Evropë më e fortë, më e guximshme dhe më sovrane besnike ndaj vetvetes, mundet”, shkruan Rama.
© SYRI.net