Dalin pamje të reja nga dhuna në Kuvendin e Kosovës, ku pati përleshje fizike ndërmjet deputetëve të Partisë Demokratike të Kosovës dhe ministrave.

Në momentin kur kryeministri Albin Kurti ishte duke folur, ai është sulmuar me ujë nga deputeti i PDK-së, Mërgim Lushtaku.

Më pas në afërsi të foltores ka dalë ministri Hekuran Murati, i cili është shtyrë nga Mërgim Lushtaku që hodhi ujë edhe në drejtim të Besnik Bislimit.

Ky i fundit më pas e gjuajti me shishe deputetin e PDK-së, Mërgim Lushtaku.

Pamjet tregojnë se dhuna nuk u provokua, por u fillua nga PDK, ndryshe nga sa thuhet në deklaratën e tyre.

“Sikur të mos u mjaftonte fyerja që i bënë shtetit të Kosovës, veteranëve të UÇK-së, akterëve politikë shqiptarë, popullit të Kosovës, para shërbëtorëve të Radojçiqit, sot, në Kuvendin e Kosovës, zëvendëskryeministri Besnik Bislimi në vend që të ndihej i turpëruar dhe të jepte llogari për përgjimet, provokoi opozitën duke i hequr fotografinë që ata i vendosën në foltore”, thuhet në deklaratën e PDK.