Opozita zhvilloi këtë pasditë mitingun elektoral përmbyllës në Pogradec në mbështetje të kandidatit të koalicionit "Bashkë Fitojmë" për kryetar bashkie, Zini Tollozhina.  

Kryetari i Partisë së Lirisë, Ilir Meta në fjalën e tij e vuri theksin te keqqeverisja e pushtetit qendror dhe lokal çka sipas tij ka çuar në falimentimin e bashkive. 

Meta tha se bashkia e Pogradecit është në prag të falimentimit dhe ka vuajtur si askush tjetër në këto katër vite edhe nga shpopullimi i rinisë.

Ai u shpreh se fitorja e kandidatëve të opozitës është e padiskutueshme në Tiranë, Durrës, Elbasan, Korçë, si dhe Pogradec.

“Bashkia e Pogradecit është në prag të falimentimit. Ai duhet të ikë se i kishte të gjitha mundësitë që të bënte diçka për Pogradecin dhe kurrë nuk e bëri. Pogradeci ka vuajtur si askush tjetër në këto katër vite edhe nga shpopullimi i rinisë. Një vend pa rini është si një shtëpi pa fëmijëve. T’i japim fund një qeverie që e ka në program shpopullimin. Këtu nxitet shpopullimi i të rinjve dhe të rejave nga trevat e vendit aty ku mundësitë për zhvillim janë të jashtëzakonshme por mungon vullneti. Fitorja është e padiskutueshme. Është në Tiranë me Belind Këlliçin, në Durrës me Igli Carën, në Elbasan me Luçiano Boçin”, u shpreh Meta.