Në kohën kur vëmendja e opinionit publik është përqendruar te situata mes Kosovës dhe Serbisë, një personazh tjetër po merr vëmendjen e medias rajonale dhe asaj evropiane.
Bëhet fjalë për presidentin e Kroacisë, Zoran Milanoviç, i cili prej ditësh po mban qëndrime të ashpra kundër Kosovës.
Gazeta e njohur austriake, ‘Kurier’ shkruan se deklaratat e tij janë shokuese.
“Ne e kemi aneksuar Kosovën. Ne me komunitetin ndërkombëtar. Ia morëm Serbisë,” tha ai.
Gazetari kosovar, Enver Robelli shkruan se Milanoviç po provkon prej kohësh me deklarata kundër Ukrainës, kundër NATO-s, kundër BE-së, kundër Shteteve të Bashkuara të Amerikës, kundër boshnjakëve.
“Para se të bëhej kryetar i Kroacisë, Milanoviç një kohë ka qenë këshilltar për “integrime evropiane” i kryeministrit aktual të Shqipërisë. Prej se ka hyrë në selinë e presidentit në Pantovçak të Zagrebit, Milanoviç është shndërruar në provokator të nivelit të kafehaneve ballkanike. Raporti i tij me qeverinë kroate është jashtëzakonisht i tensionuar dhe shoqërohet me sharje të rënda të ndërsjella. Shumë analistë në Zagreb besojnë se Milanoviç është presidenti më i turpshëm në historinë bashkëkohore të Kroacisë. Sa i përket Kosovës: kur ishte i papunë, Milanoviç vinte për “vizitë private” në Prishtinë për të gjetur ndonjë angazhim – në vendin që, sipas tij, iu paskësh grabitur Serbisë nga Perëndimi,” shkruan Robelli.
Por pse shkruan ai se Milanoviç është këshilltar i Edi Ramës? Në fakt, vetë kryeministri Edi Rama e ka pranuar se e ka këshilltar dhe mik të mirë.
Në gusht të vitit 2020, Milanoviç ishte i pranishëm me familjen e tij në vilën qeveritare në Dhërmi, si i ftuar i Edi Ramës. Mediat publikuan një foto ku Rama shfaqet duke darkuar me Milanoviç.
Miqësia e Ramës me Milanoviç është më e hershme se sa viti 2020. Ish-kryeministri i Kroacisë ka qenë edhe shefi i ish-diplomates së deleguar si ambasadore e BE, Romana Vlahutin.
Mediat kroate raportonin në atë kohë se vëllai i presidentit Milanoviç ka përfituar një kontratë të majme nga taksat e shqiptarëve. Edi Rama i ka dhënë atij një tender prej 15 milionë eurosh.
© SYRI.net