Gazeta malazeze Pobjeda ka publikuar të dhëna për një skandal të përmesave ndërkombëtare. 

Gazeta e njohur shkruan se Tirana dhe Beogradi në bashkëpunim kanë thyer sanksionet e vendosura nga Perëndimi ndaj Rusisë. Madje Edi Rama dhe Aleksandër Vuçiç kanë futur në valle edhe Malin e Zi.

Kryeministri i këtij vendi, Dritan Abazoviç është përdorur për të thyer këto sanksione të vendosura nga BE dhe SHBA.

Sipas “Pobjeda”, mijëra kamionë u ngarkuan me pleh kimik nga anijet që erdhën nga Rusia në Portin e Durrësit, kaluan në Malin e Zit përmes pikës kufitare të Hanit të Hotit dhe nga territori malazez u futën në Serbi pranë Dobrakovit. Në kthim, kamionët janë ngarkuar me drithë dhe kanë kryer të njëjtin itinerar.

Gazetarët malazezë raportojnë se për transportin e drithërave dhe të plehut kimik në Shqipëri u përfshi një kompani e madhe e lidhur me autoritetet e Tiranës, të cilët kanë mbyllur një sy për tregtinë mes Vuçiçit dhe Putinit, në shkelje të sanksioneve që SHBA dhe Bashkimi Europian kanë vendosur ndaj Rusisë. Për këtë sillet edhe një foto e një fature që dëshmon për futjen e mallit në Portin e Durrësit me origjinë nga Rusia dhe me destinacion Serbinë.

Ajo që bie në sy në shkrim është edhe pjesa kur thuhet se thyerja e sanksioneve është zbuluar nga agjencitë e huaja perëndimore dhe tashmë prej 10 ditësh nuk ka më asnjë anije ruse në Portin e Durrësit.

Por mbi të gjitha bie në sy se i gjithë ky skandal me përmesa ndërkombëtare është bërë duke pasur si ‘mburojë’, nismën serbe të Ballkanit të Hapur.

“Duke qenë se për këto transporte përdoret territori i Malit të Zi, i cili vendosi sanksione ndaj regjimit të Putinit, lind pyetja – Cili është roli i shtetit malazez në të gjithë operacionin? A janë autoritetet në Drejtorinë e të Ardhurave dhe Doganave, si dhe operativët e ANB-së – dhe, kishin informacione se territori malazez po keqpërdorej ose dikush i rëndësishëm nga kreu i shtetit urdhëroi të “mbyllnin sytë” të gjithë në emër të “Ballkanit të Hapur”,” shkruan gazeta.