Në një kohë që 4200 firmat e delegatëve që kërkojnë mbledhjen e Kuvendit Kombëtar janë në selinë e PD, në zyrën e kreut të Këshillit Kombëtar, Lulzim Basha e ka cilësuar këtë si puç dhe ka sulmuar liderin historik të Partisë Demokratike Sali Berisha se po ndihmon Edi Ramën. Delegatët kërkojnë ndryshime statutore dhe përcaktimin e aksionit të ri opozitar, por Basha vijon ta cilësoj Kuvendin dhe firmëtarët si anti-amerikan.

Nga SYRI TV

Lulzim Basha kundërshton me forcë mbledhjen e këshillit kombëtar për ndryshimet statutore. Në një dalje për mediat në selinë e PD-së, Basha u shpreh se firmat janë fshehur dhe demokratët janë tallur. Sipas tij kjo lëvizje është një puç brenda PD-së për të rrëzuar Bashën, duke akuzuar liderin historik të PD-së se në këtë narrativë po ndihmohet nga segmente të pushtetit të Edi Ramës.

Duke anashkaluar thelbin e çështjes, Basha I kërkoi Berishës që të dorëzojë firmat e mbledhura, siç e kërkon statuti. Basha tha se është I gatshëm ta mbledhë kuvendin, por nuk janë dorëzuar ende firmat.

4200 formularët me firmat e delegatëve dorëzuan mbrëmjen e djeshme nga një përfaqësi e firmëtarëve në zyrën e kryetarit të Këshillit Kombëtar Edi Paloka, e cila është vetëm pak metra larg zyrës së kryetarit të sotëm PD-së.

Në shkresën bashkangjitur thuhet se mbledhja e Kuvendit Kombëtar, bëhet me qëllim miratimin e ndryshimeve statutore si dhe kërkohet analiza e qëndrimeve të kryetarit ndaj parimeve themelore të PD-së dhe anëtarësisë.

Në kuvend ata do të kërkojnë të përcaktohen dhe hapat e mëtejshme të aksionit politik opozitar që do të ndiqen në përballje me pushtetin e Ramës.