'Kur asgjë nuk ishte tabu': 10 imazhe intime të një Parisi të humbur dhe dekadent të viteve 1930

Duke lëvizur "pa mundim nga lagjet e varfra në sallone ekskluzive", fotografi legjendar Brassaï kapi bordellot, baret e gejve dhe rrugicat e natës së mjegullt të Parisit në vitet radikale midis dy luftërave botërore.

Fotografitë e Brassaï-t të të dashuruarve në kafene, gargullave të Notre Dame dhe rrugëve të ndriçuara nga llambat e Montmartre, janë disa nga më ikoniket e Parisit të prodhuara ndonjëherë. Një pionier i fotografisë së natës, ai ka formësuar pamjen e qytetit si një vend për romancë, i kapur përgjithmonë në një botë të mjegullt hijesh. "Parisi që ëndërroni, ky është Parisi i Brassaï-t", i thotë BBC-së Anna Tellgren, kuratore e Brassaï: Shenjat Sekrete të Parisit në Muzeun Moderna në Stokholm.  

Por krijimtaria e tij përfshin shumë më tepër sesa grupi i zgjedhur i imazheve të riprodhuara në kartolina.

I lindur si Gyula Halász në vitin 1899 në Brassó, Transilvani, atëherë pjesë e Hungarisë, Brassaï filloi të studionte art në Budapest në vitin 1918 dhe vazhdoi studimet në Berlin. Ai mbërriti në kryeqytetin francez në vitin 1924, ku përqafoi jetën e natës sekrete të qytetit gjatë viteve midis dy luftërave botërore, një epokë kur asgjë nuk ishte tabu. I tërhequr instinktivisht nga të përjashtuarit e qytetit, ai guxoi të merrte pjesë në ballo për homoseksualë, bare gejsh dhe bordello, duke portretizuar botët e tyre të brendshme pa asnjë ndjenjë voajerizmi apo gjykimi moral. "Ai ishte një nga të parët që shkoi atje dhe dokumentoi këto mjedise. Është dokumentim shumë i hershëm i jetës queer", thotë Tellgren.

Brassaï botoi një përzgjedhje të punimeve të tij në Paris de Nuit (Parisi natën) në vitin 1933, gjë që i solli famë të menjëhershme. Megjithatë, menjëherë pas Luftës së Dytë Botërore, censura kufizuese e pengoi të botonte fotografitë e tij më intime. Ai do të duhej të priste deri në vitin 1976 për të botuar ‘Le Paris Secret des Années 30’ (Parisi Sekret i viteve 1930). Të dy librat e kombinuar ofrojnë një dritare interesante në një botë të humbur përgjithmonë. Këtu shohim 10 nga imazhet e tij më sugjestive të qytetit.