James Bond ‘duhet të jetë burrë’, thotë Helen Mirren

Dame Helen Mirren ka thënë se James Bond duhet të interpretohet nga një burrë, edhe pse ajo është “feministe e madhe”.

Në një intervistë të re për Saga Magazine, aktorja fituese e çmimit Oscar u shpreh: “Nuk mund të kesh një grua. Thjesht nuk funksionon. James Bond duhet të mbetet James Bond, përndryshe bëhet diçka tjetër.”

Amazon MGM Studios do të prodhojë versionin e ardhshëm të kësaj sage spiunazhi, me krijuesin e Peaky Blinders, Steven Knight, i cili do të shkruajë skenarin e filmit të 26-të të serisë.

Kompania amerikane e prodhimit dhe shpërndarjes më herët kishte deklaruar se planifikonte një qasje “të freskët” për sagën, por duke nderuar “trashëgiminë” e këtij “personazhi ikonik.”

Dama Helen Mirren, 80 vjeçe, aktualisht po luan përkrah ish-aktorin e James Bond-it, Pierce Brosnan, në adaptimin kinematografik shumë të pritur të romanit The Thursday Murder Club, ku ajo interpreton një spiune në pension.

Brosnan, 72 vjeç, i tha gjithashtu revistës se besonte që James Bond duhet të vazhdojë të interpretohet nga një aktor mashkull dhe se ai ishte i emocionuar të “shihte një energji dhe jetë të re për këtë personazh.” Ai luajti në katër filma Bond si agjenti 007, duke filluar me GoldenEye në vitin 1995 dhe duke përfunduar me Die Another Day në vitin 2002.

Më herët, Dama Helen është shprehur se koncepti i James Bond-it lindi nga “seksizmi i thellë,” por ka theksuar se gratë gjithmonë kanë qenë një “pjesë jashtëzakonisht e rëndësishme” e shërbimit sekret.

Aktorët nuk janë të parët që hedhin poshtë idenë e një James Bond grua. Në Festivalin e Filmit në Kanë në maj, Halle Berry, e cila gjithashtu luajti në Die Another Day, tha: “Në vitin 2025 është bukur të thuash, ‘Oh, duhet të jetë një grua.’ Por s'e di nëse mendoj që është gjëja e duhur.”

Saga e James Bondit ishte në pronësi të familjes Broccoli për më shumë se 60 vjet, por producentët Barbara Broccoli dhe Michael G. Wilson ia shitën kontrollin krijues Amazonit më herët këtë vit për rreth 1 miliard dollarë.

Spekulimet për aktorin që do të luajë rolin kryesor janë të shumta, me aktorët britanikë Aaron Taylor-Johnson dhe James Norton të përfolur si favoritë.

Aktualisht nuk ka një datë zyrtare për daljen e filmit të ardhshëm. / BBC - Syri.net