Mozaik me mbishkrim që nderon Justinianin dhe Theodorën/ Zbulim i rrallë në Kosovë, jehonë edhe në mediat ndërkombëtare

Mediat e huaja i kanë dhënë jehonë një zbulimi të jashtëzakonshëm në qytetin e Ulpianës, afër Prishtinës, ku arkeologët e Kosovës kanë zbuluar një mbishkrim mahnitës në mozaik që daton nga mbretërimi i perandorit Justinian I (527–565 pas Krishtit).

Mbishkrimi nderon Justinianin dhe gruan e tij, perandoreshën Theodora, në përkushtimin e një kishe të re, raporton ">Live Qurious.

Ky zbulim vjen dy vjet pas gjetjes së parë të një mbishkrimi të Justinianit në Ulpianë, i cili dokumentonte rolin e perandorit në rindërtimin e qytetit si “Justiniana Secunda” pas tërmetit shkatërrues të vitit 518 pas Krishtit.

Ulpiana, dikur një qendër urbane e rëndësishme në provincën romake të Dardanisë, u godit rëndë nga katastrofa natyrore, por u rindërtua duke ruajtur elemente të kulturës romake dhe të krishterë, të ndërthurura me traditat lokale.

Zbulimi i ri jo vetëm që përforcon burimet historike mbi fushatat e rindërtimit të Justinianit, por edhe hedh dritë mbi identitetin kulturor unik të qytetit.