Nga Didier Haine, SUD INFO

Personi 29-vjeçar shqiptar, i cili u gjet të dielën e kaluar i varur me një kabllo pas një tabele rruge në autostradë pranë Westland Shopping Center në Anderlecht, është një burrë me emrin Bekim Halilaj. Me origjinë nga Bicaj, një fshat në qarkun e Kukësit në verilindje të Shqipërisë, ai nuk ishte askush tjetër përveçse një trafikant i njohur kokaine.

“Kryeqyteti i kokainës”

Bekim Halilaj ishte dënuar me shtatë vjet burg nga gjykatat britanike në vitin 2017, kur ishte vetëm 21 vjeç. Ai ishte pjesë e një organizate kriminale shqiptare, e akuzuar për shpërndarjen e më shumë se 4 milionë paund kokainë në Southampton, Hampshire.

Halilaj u arrestua më 21 prill 2017 nga policia e Hampshire pas një hetimi nëntëmujor. Tre bashkatdhetarë dhe bashkëpunëtorë të tij u arrestuan fillimisht pas një kontrolli në një furgon në Southampton, ku u gjet jo vetëm kokainë me vlerë 140,000 paund, por edhe 30.000 paund në para të gatshme.

Më pas, një kontroll në një ndërtesë në Portswood çoi në gjetjen e vetë Bekim Halilajt dhe kokainës me vlerë 10.000 paund. Droga, e cila ishte me cilësi shumë të lartë dhe në disa raste arrinte një pastërti prej 91%, transportohej nga Essex në këtë vend, ku përpunohej dhe ndahej para se të rishitej.

Arratisja dhe rikthimi në krim

Udhëheqësi i kësaj organizate kriminale shqiptare arriti të arratisej dhe u vendos në Belgjikë, ku rifilloi aktivitetet e tij kriminale, veçanërisht pranë Antwerp-it, përpara se të arrestohej përfundimisht dy vite më vonë, më 4 prill 2019, dhe të ekstradohej në Angli për t’u përballur me drejtësinë.

Pas lirimit nga burgu, Bekim Halilaj, i cili kishte qëndruar ilegalisht në Angli, u deportua dhe u vendos në Belgjikë, ku thuhet se u rrëmbye, ekzekutua dhe u var si paralajmërim pas humbjes së një ngarkese të madhe kokaine.

“Kjo është ajo që ndodh nëse përpiqesh të na bësh dëm,” ishte mesazhi i dërguar, sipas gazetarit hetimor shqiptar Artan Hoxha.

“Praktika si në Meksikë”

“Meqë nuk arritën të vinin dorë mbi ata që ishin vërtet përgjegjës për humbjen e kësaj ngarkese të madhe kokaine, dhe pasi e dinin që Bekim Halilaj ishte në bashkëpunim me ta, e bënë atë të paguante çmimin për gjithë këtë histori! Është e pabesueshme që kemi arritur në praktika të ngjashme me ato të karteleve meksikane në zemër të Evropës,” – ankohet i njëjti gazetar hetimor shqiptar, për të cilin Antwerp-i, “dikur kryeqyteti i diamantëve”, sot është bërë “kryeqyteti i kokainës”!

Megjithatë, kur u pyetën, policia dhe autoritetet gjyqësore deklaruan se teoria e vetëvrasjes ende nuk është përjashtuar dhe madje është “teoria që edhe sot mbetet më e favorizuara” në këtë fazë të hetimit.