Sulmohet suedezi në Manastir, dyshohet se u ngatërrua për shqiptar për shkak të bluzës me shqiponjë

Një 32-vjeçar suedez, i cili po qëndron përkohësisht në Dibër, është sulmuar të enjten në mbrëmje në qytetin e Manastirit, Maqedoni e Veriut.

Ngjarja ndodhi në rrugën kryesore të qytetit “Rruga e Gjerë” ku disa të rinj rreth moshës 20 vjeç iu afruan dhe tentuan t’i heqin me forcë bluzën që kishte veshur.

Sipas denoncimit të bërë në polici, bluza kishte simbole që dyshohet se i përkisnin Shqipërisë, ç’ka besohet të ketë qenë edhe arsyeja e sulmit. Kur kuptoi se nuk mund të mbrohej, 32-vjeçari vendosi t’ua dorëzojë vetë bluzën personave të panjohur, të cilët më pas u larguan nga vendngjarja.

Ministria e Punëve të Brendshme e Maqedonisë së Veriut konfirmoi incidentin përmes një njoftimi zyrtar:

“Të enjten, rreth orës 19:50, në SPB Manastir, S.H.D. (32) nga Suedia, me qëndrim të përkohshëm në Dibër, raportoi se persona të panjohur i janë afruar dhe kanë tentuar t’i heqin bluzën me simbole të një shteti tjetër.”