‘Telegraaf’: Pamje shokuese, holandezi dhunon vajzën e tij në Korçë, e ëma nuk bën asnjë ndërhyrje

Policia në qytetin shqiptar të Korçës ka nisur një hetim ndaj një shtetasi holandez, i cili ka tërhequr vajzën e tij zvarrë nga flokët në rrugë. Bashkatdhetari ynë është identifikuar dhe marrë në pyetje. Ai është tashmë i akuzuar për dhunë ndaj fëmijës në Shqipëri.

Nga Marcel Vink, TELEGRAAF

Policia në Korçë, një qytet në juglindje të Shqipërisë – jo larg kufirit me Greqinë dhe Maqedoninë e Veriut – ka publikuar dy foto nga sulmi i dyshuar.

Në pamje shihet burri duke e tërhequr vajzën zvarrë nga flokët përgjatë rrugës për një kohë të gjatë. Një grua, ndoshta nëna e vajzës, ecën pranë tij pa thënë asgjë dhe pa ndërhyrë.

Pamjet shqetësuese u shpërndanë fillimisht në rrjetet sociale, gjë që solli në vëmendje të policisë lokale rastin në fjalë. Policia siguroi videon origjinale dhe nisi menjëherë kërkimet për burrin e dyshuar për dhunë publike ndaj vajzës.

Dy personat u identifikuan dhe u lokalizuan shpejt. Më pas, burri — që rezultoi të ishte babai i vajzës — u thirr në komisariat për të dhënë shpjegime lidhur me sjelljen e tij brutale. Edhe gruaja — e cila shfaqet në video me shami në kokë — u thirr për të dhënë një deklaratë.

Gjatë marrjes në pyetje, u konfirmua se burri është babai biologjik i vajzës së mitur. Ai është identifikuar si MU, një shtetas holandez 33-vjeçar. Nuk është bërë e ditur pse ata ndodheshin në Shqipëri; mund të kenë qenë për pushime në zonë.

Pas marrjes së parë në pyetje, çështja u referua në Prokurorinë pranë Gjykatës së Shkallës së Parë në Korçë. Aty u vendos që ndaj MU të nisin procedurat penale.

Policia po vijon hetimet për të kuptuar plotësisht sfondin e ngjarjes dhe u bën thirrje qytetarëve që të raportojnë menjëherë çdo rast dhune apo abuzimi ndaj fëmijëve.