Drejt ‘tokës së premtuar’… Kapet jahti me emigrantë në ujërat britanike, mes tyre 4 shqiptarë! Arrestohen 2 ukrainas

Shtatë persona janë arrestuar nga autoritetet britanike, pasi një jaht që mbante emigrantë të paligjshëm u ndalua në Kanalin Anglez.

Anija, e cila vinte nga Franca veriore, u pikas nga Forca Kufitare pranë Ishullit Wight të dielën pasdite, tha Agjencia Kombëtare e Krimit (NCA).

Autoritetet britanike arrestuan dy pjesëtarët e ekuipazhit të jahtit,  dy shtetas ukrainas të moshës 43 dhe 37 vjeç, për lehtësim të imigracionit të paligjshëm.

Në bordin e jahtit ndodheshin 5 emigrantë, 4 prej të cilëve shqiptarë dhe një shtetas vietnamez - u ndaluan gjithashtu sipas ligjeve të imigracionit.

Zyrtari i Lartë Hetues, Julian Harriman tha: “Ky operacion ishte pjesë e një hetimi të vazhdueshëm të NCA-së, të udhëhequr së bashku me autoritetet gjyqësore franceze dhe Xhandarmërinë Kombëtare.”

"Luftimi i bandave që kontrabandojnë njerëz mbetet një përparësi, si për Francën ashtu edhe për Mbretërinë e Bashkuar."

Shtatë të dyshuarit mbeten në paraburgim, ndërsa jahti u dërgua në Marinën e Gosport./ BBC.