Në Fshati Qesarak të Maliq ka rënë qetësia pas tmerrit të përjetuar mbrëmjen e së premtes dhe mëngjesin e së shtunës, ku Ramiz Muçollari plagosi me thikë bashkëshorten dhe me qytën e pushkës edhe djalin e tij. 62-vjeçari i cili vuante nga shëndeti mendor sulmoi me armë edhe policinë, duke shkaktuar panik në fshat. Pas më shumë se 8 orë negociatash ai u vra nga RENEA, ndërsa gjendja shëndetësore e të plagosurve nënë e bir, Pëllumbesha dhe Kamber Muçollarit është e stabilizuar.

Nga SYRI TV

Dy të plagosurit, nënë e bir që u sulmuan nga kryefamiljari Ramiz Mucollari tashmë ndodhen jashtë rrezikut për jetën në spitalin e Korçës.

Në deklaratën e dhënë para oficerëve të policisë gjyqësore Pëllumbesha Muçollari, ka thënë se shkak për acarimin e situatës ka qenë tentativa për ta bindur Ramizin 62 vjeç të shtrohej në spital, pasi gjendja e tij e shëndetit mendor ishte përkeqësuar.

Në diskutim e sipër, Ramiz Muçollari e ka goditur me thikë kuzhine bashkëshorten të cilës i ka shkatura plagë në pjesë e këmbës. Në sherr ka ndërhyrë edhe djali i tyre, Kamber Muçollari 27 vjeç ku edhe ky i fundit është sulmuar nga babai i tij, duke marrë plagë në pjesën e kokës. 62-vjeçari Ramiz Mucollari e ka goditur me pjesë e pasme të mitralozit, djalin e tij.

Pas plagëve të marra ata kanë njoftuar policinë. Me të mbërritur uniformat blu, gjendja shëndetësore e 62-vjeçarit është përkeqësuar, pasi ai vuante nga probleme të shëndetit mendor dhe trajtohej vazhdimisht me medikamente.

Sapo kanë arritur policia ai ka filluar të qëllojë me armë në drejtim të tyre duke mos pranuar të dorëzohet. Pas disa orë negociatash, forcat e rendit janë tërhequr, pa sukses, ndërsa kanë kërkuar ndërhyrjen e njësisë speciale RENEA.

Edhe këtë të fundit kanë tentuar ta bindin 62 vjecarin të dorëzohet, por sërish ka qenë i pamundur komunikimi pasi janë përballur me breshëri plumbash.

Përballë një situate të tillë dhe frikës së lëndimeve të qytetarëve të pafajshëm, ata ia janë kundërpërgjigjur me armë duke e lënë të vdekur 62-vjeçarin Ramiz Muçollari i cili qëndronte në papafingon e banesës së tij.

Ndërkohë kanë nisur hetimet për të verifikuar nëse veprimet e oficerëve të RENEAS kanë qenë brenda protokollit ligjor.