Një i ri shqiptar humbi jetën tragjikisht mbrëmjen e djeshme në qytetin e Firenzes.

28-vjeçari gjeti vdekjen ndërsa udhëtonte me motor. Ngjarja e rëndë u shënua rreth orës 20:00.

Sipas mediave italiane, i riu po kthehej nga puna për në shtëpi.

Ai ishte rezident në Prato, ku jetonte prej kohësh.

Në momentin e aksidentit, 28-vjeçari udhëtonte me një motor scooter.

Janë ende të paqarta rrethanat se si u përplas me një makinë.

Përplasja ishte aq e fortë sa i riu përfundoi disa metra larg, duke gjetur vdekjen në vendin e ngjarjes.

Shqiptari, identiteti i të cilit nuk bëhet i ditur në mediat e vendit fqinj, ishte i martuar dhe kishte një vajzë të vogël.

Bashkëshortja dhe nëna e tij mësohet se shkuan në vendin e ngjarjes, pasi u njoftuan për aksidentin tragjik.

Ato u përballën me skenën e tmerrshme dhe u dërguan në spital për shkak të tronditjes.

Për aksidentin e rëndë autoritetet policore kanë nisur hetimet.