Gjermania humb ndaj Ekuadorit dhe ngre dyshime para fazës me eliminim direkt

Një nga rivalët e mundshëm të Francës në 1/8 e finales së Kupës së Botës 2026, Gjermania, ka lënë shumë pikëpyetje pas humbjes 2-1 ndaj Ekuadorit në ndeshjen e fundit të fazës së grupeve. Edhe pse tashmë e kualifikuar dhe e para në grup, “Die Mannschaft” tregoi pasiguri të dukshme në prapavijë.

Ndeshja u zhvillua në ‘MetLife Stadium’ dhe surprizoi shumëkënd, pasi trajneri Julian Nagelsmann vendosi të mos bëjë rotacion, por të aktivizojë thuajse formacionin më të fortë. Përjashtim bënë vetëm Antonio Rüdiger, i cili zëvendësoi Nico Schlotterbeck në qendër të mbrojtjes për shkak dëmtimi, dhe David Raum që mori vendin e Nathaniel Brown në krahun e majtë.

Pavarësisht kësaj, Gjermania nuk arriti të shmangte humbjen ndaj Ekuadorit, duke treguar probleme serioze në organizimin difensiv. Kjo paraqitje ka rritur shqetësimet në kampin gjerman, sidomos duke marrë parasysh se skuadra kishte shpresuar të përdorte këtë ndeshje pa rëndësi për të ruajtur energjitë dhe për të aktivizuar lojtarët e stolit.

Forma e dobët në mbrojtje vjen në një moment të rëndësishëm të turneut, pasi Gjermania mund të jetë kundërshtari i Francës në fazën e 1/8 së finales, më 4 korrik, në Filadelfia. Kjo ndeshje potenciale tashmë shihet si një test i madh për të dyja skuadrat, por paraqitja e fundit e gjermanëve u jep shpresa shtesë francezëve.

Edhe pse Gjermania e mbylli grupin në vend të parë, humbja ndaj Ekuadorit ka lënë një shije të hidhur dhe ka hapur diskutime për stabilitetin e saj mbrojtës para fazës vendimtare të Botërorit.