Tre skenarët që vendosin fatin e Kroacisë në Kupën e Botës, nga vendi i parë tek eliminimi

Kroacia mbetet plotësisht në garë për një vend në fazën me eliminim direkt të Botërorit 2026, pas fitores minimale 1-0 ndaj Panamasë falë golit të Ante Budimir.

Megjithatë, gjithçka do të vendoset në ndeshjen e fundit të Grupit L, ku kroatët do të përballen me Ganën, ndërsa Anglia do të luajë ndaj Panamasë.

Skuadra e drejtuar nga Zlatko Daliç mund ta mbyllë grupin në çdo pozicion, nga vendi i parë deri tek i treti, në varësi të rezultateve të së shtunës.

Skenari i parë: Fitorja siguron kualifikimin. Nëse Kroacia mposht Ganën, ajo siguron të paktën vendin e dytë në grup dhe kalimin e drejtpërdrejtë në fazën e 1/32-ave, pa u varur nga rezultati i ndeshjes Angli-Panama.

Skenari i dytë: Mjafton edhe një barazim. Me një pikë, Kroacia do të arrinte në kuotën e katër pikëve dhe do të kishte golavarazh më të mirë se Paraguai, duke siguruar matematikisht një vend mes tetë skuadrave më të mira të vendeve të treta. Një barazim do ta kualifikonte edhe Ganën.

Skenari i tretë: Humbja rrezikon eliminimin. Edhe pse teorikisht Kroacia mund të kalojë më tej me tri pikë, shanset do të zvogëloheshin ndjeshëm. Në atë rast, ajo do të mbetej pas Suedisë, Ekuadorit, Bosnjë Hercegovinës dhe Paraguait në renditjen e vendeve të treta, ndërsa do të parakalohej edhe nga Koreja e Jugut për shkak të golavarazhit më të mirë.

Aktualisht, Kroacia renditet e pesta mes skuadrave të vendeve të treta, por fati i saj mbetet në duart e veta.

Një rezultat pozitiv ndaj Ganës do të mjaftonte për të shmangur çdo llogari dhe për të siguruar vazhdimin e rrugëtimit në Botërorin 2026.