Mbrojtja civile saudite kishte lëshuar disa paralajmërime për qytetin Yanbu, në brigjet e Detit të Kuq, dhe më vonë njoftoi se rreziku kishte kaluar. Paralajmërim u dha gjithashtu për qytetin port të Jizanit, rreth 1 mijë kilometra në jug, pranë kufirit me Jemenin.

Deri tani nuk ka pasur raportime zyrtare për dëme.

Sipas burimeve, sistemi i mbrojtjes ajrore drejtohej nga personel ushtarak grek. Greqia ka vendosur një bateri të mbrojtjes ajrore Patriot, të prodhuar në SHBA, në Arabinë Saudite që nga viti 2021, në kuadër të një marrëveshjeje për të ndihmuar në mbrojtjen e infrastrukturës energjetike të mbretërisë.

TRUMP KËRCËNON "NDËSHKIM TË MADH" PËR IRANIN DHE JEMENIN

Presidenti amerikan Donald Trump premtoi të premten "ndëshkim të madh ushtarak" ndaj Teheranit dhe aleatëve të tij Houthi në Jemen, pasi rebelët Houthi deklaruan se kishin goditur dy cisterna saudite në Detin e Kuq të enjten.

Houthit, të cilët kontrollojnë veriun dhe perëndimin e Jemenit, kanë shpallur një bllokadë detare ndaj Arabisë Saudite. Mbretëria saudite ka devijuar çdo ditë miliona fuçi naftë përmes tubacioneve drejt Detit të Kuq, për të shmangur bllokadën pothuajse totale të Iranit në Ngushticën e Hormuzit, në Gjirin Persik.

Një koalicion i udhëhequr nga Arabia Saudite, që lufton kundër Houthive në Jemen, tha se kishte goditur objektiva ushtarake të grupit jemenas ditët e fundit, pas sulmeve ndaj cisternave saudite.

Ushtria amerikane ndërmori sulme ajrore ndaj Iranit vonë të enjten dhe në orët e para të së premtes, duke shënuar natën e 13-të radhazi të bombardimeve, por të shtunën nuk pati raportime për sulme të reja amerikane.

Dy javë pas dështimit të armëpushimit të përkohshëm që synonte t’i jepte fund luftës, forcat e armatosura iraniane u kundërpërgjigjën të premten duke sulmuar baza amerikane në vendet fqinje arabe dhe paralajmëruan se mund të godisnin edhe ndërtesa joushtarake të përdorura nga personeli amerikan./Reuters/