Ushtria e SHBA: Dy ushtarë amerikanë të vrarë, një i zhdukur në sulmin e Iranit në një bazë në Jordani

Ushtria amerikane njoftoi se dy ushtarë amerikanë u vranë dhe një tjetër u zhduk pas sulmeve iraniane në një bazë në Jordani, raporton agjencia Associated Press.

Në deklaratën e ushtrisë amerikane, shkruhet se dy ushtarë u vranë të premten, ndërsa forcat amerikane dhe aleatët e tyre në Lindjen e Mesme u mbrojtën kundër raketave balistike dhe dronëve nga Irani .

Thuhet se katër anëtarë të tjerë të ushtrisë u evakuuan nga një spital në Jordani dhe se më vonë u liruan nga trajtimi.

Reuters raportoi më parë se Irani nisi sulme të reja ndaj aleatëve të SHBA-së në Gjirin Persik.

Në Kuvajt, një impiant desalinimi u godit dhe operacionet në Aeroportin Ndërkombëtar u pezulluan për shkak të kërcënimeve të përsëritura me raketa dhe dronë.

Korporata e Naftës e Kuvajtit njoftoi më vonë se një nga objektet e saj të naftës ishte goditur në sulme të reja nga Irani.

Fabrika u dëmtua gjatë sulmit dhe një numër i vogël njerëzish u plagosën.

Forcat e armatosura të Kuvajtit njoftuan se kanë interceptuar raketa balistike dhe dronë iranianë këtë mëngjes, duke shtuar se një numër i madh zjarrfikësish dhe punëtorësh në sektorin e naftës u plagosën.

Garda Revolucionare e Iranit njoftoi më herët sot se kishte sulmuar një bazë ajrore të përdorur nga SHBA-të në Bahrein në përgjigje të bombardimeve të SHBA-së.

Sistemi i paralajmërimit të hershëm i Arabisë Saudite u bëri thirrje banorëve të Al-Harj dhe Yanbu që të shkojnë në strehimore sot.Dy burime anonime të Reuters thanë se paralajmërimi u lëshua për shkak të një sulmi iranian, i pari në më shumë se tre muaj.

Në Al-Harj, në lindje të Riadit, ndodhet një bazë ushtarake ku janë të stacionuara trupat amerikane, ndërsa në Yanbu, në Detin e Kuq, ndodhet një terminal i rëndësishëm për eksportin e naftës.

Mediat shtetërore saudite nuk thanë pse u lëshua paralajmërimi dhe zyra e medias e qeverisë nuk pranoi të komentonte për Reuters.

Garda Revolucionare e Iranit nuk ka njoftuar se ka sulmuar Arabinë Saudite sot.