Charlie Kirk më tha të parandaloja luftën me Iranin para se të vdiste, thotë aleati i Trump-it që dha dorëheqjen

Një nga gjërat e fundit që Charlie Kirk i kërkoi shefit të antiterrorizmit të Donald Trump-it ishte: "Shmang hyrjen në luftë me Iranin".

Joe Kent dha dorëheqjen si drejtor i antiterrorizmit të martën, duke thënë se "nuk mund ta mbështes me ndërgjegje të pastër luftën".

Kirk, i cili themeloi Turning Point USA, një organizatë që promovon politika konservatore në kampuset universitare, ishte një aktivist Maga dhe politikisht i afërt me Trump-in, i cili e lavdëroi për bindjen e amerikanëve të rinj që të votonin dhe ta ndihmonin të rikthehej në Shtëpinë e Bardhë.

31-vjeçari u qëllua për vdekje në Universitetin e Utah Valley në shtator 2025, në një atentat që tronditi vendin.

"Herën e fundit që pashë Charlie Kirk-un në këtë botë ishte në qershor në Krahun Perëndimor," tha Kent gjatë një interviste me Tucker Carlson-in, ish-prezantues i Fox News, e publikuar të mërkurën vonë. "Më pa drejt në sy... dhe më tha: 'Joe, "Shmang hyrjen në luftë me Iranin.'

Kent, i cili shërbeu në ushtrinë amerikane për dy dekada, ka qenë një kritik i zëshëm i "luftërave të pafundme" të fundit të vendit në Irak dhe Afganistan.

"Nuk mund të mbështes dërgimin e brezit të ardhshëm për të luftuar dhe vdekur në një luftë që nuk i sjell asnjë përfitim popullit amerikan," shkroi ai në një letër drejtuar Trump-it, të cilën e publikoi në llogarinë e tij në X të martën.

Ai tha se "Irani nuk përbënte asnjë kërcënim të menjëhershëm për vendin tonë", duke kundërshtuar arsyetimet e mëparshme të Trump-it për sulmet, dhe shtoi se SHBA ishte tërhequr në luftë nga Izraeli.

Dorëheqja e tij zemëroi presidentin, i cili tha se "është gjë e mirë që ai iku".
Sipas raportimeve, FBI-ja po shqyrton nëse Kent ka nxjerrë informacione të klasifikuara; kjo u bë e ditur të mërkurën, megjithëse thuhet se hetimi kishte nisur para dorëheqjes së tij.

Duke folur në emisionin e Carlson-it, ai vuri në dyshim rrethanat e vdekjes së Kirk-ut, duke thënë se agjentët e tij të inteligjencës donin të hetonin për një përfshirje të mundshme izraelite, por hetimi ishte "ndalur".

Nuk ka prova që Izraeli të ketë qenë i përfshirë në atentatin ndaj Kirk-ut, një teori konspirative së cilës Carlson i ka dhënë peshë. I dyshuari për të shtënat, Tyler Robinson, që besohet se ka vepruar i vetëm, është në pritje të gjyqit.

Carlson, dikur një nga të besuarit e Trump-it dhe i akuzuar muajt e fundit për antisemitizëm, e ka përshkruar më parë luftën me Iranin si "absolutisht të neveritshme dhe të keqe". / The Telegraph – Syri.net