Në Ursberg, një punishte tradicionale e ngjyrosjes së vezëve po përjeton ditët më të ngarkuara të vitit, ndërsa afrohen Pashkët.

Makineritë punojnë pa ndërprerje, duke prodhuar mijëra vezë shumëngjyrëshe çdo orë, në një proces që ndërthur traditën me teknologjinë.

Në këtë punishte familjare, me mbi 70 vite histori, çdo ditë gjatë sezonit përpunohen deri në 34 mijë vezë në orë. Vizitorë nga e gjithë Gjermania Jugore vijnë për të parë nga afër transformimin e një veze të bardhë në një simbol festiv shumëngjyrësh.

“Kemi rreth 500 fermerë partnerë nga një rreze prej 250 kilometrash rreth Ursbergut. Përdorim të gjitha metodat e rritjes: në kapanon, në natyrë dhe bio. Ngjyra që përdorim është një përzierje 70-vjeçare, përmban shellac për të ruajtur vezën, ngjyrues ushqimorë, dyll karnauba që kontrollon depërtimin e ngjyrës dhe alkool për përpunimin e saj”, u shpreh Markus Rothermel, Drejtor i Fabrikës.

Vezët vijnë ekskluzivisht nga fermat lokale, duke ruajtur kështu lidhjen me prodhimin rajonal dhe cilësinë artizanale.

Procesi i zierjes mbetet një nga sfidat më të mëdha, një sekret i ruajtur me kujdes nga kompania.

“Njerëzit i duan vezët tona sepse janë të ziera butë. E bardha mpikset në 84 gradë, e verdha në 68, dhe ne duhet të sigurohemi që nxehtësia të mos depërtojë te e verdha. Metoda është sekret, por arrijmë gjithmonë rezultatin e duhur”, u shpreh Markus Rothermel, Drejtor i Fabrikës.

Punëtorët kontrollojnë me kujdes çdo vezë, duke riparuar ngjyrën aty ku është e nevojshme, ndërsa rripi transportues vazhdon pa pushim.

Në dyqanin e fermës, vizitorët mund të blejnë produktet dhe të ndjekin nga afër procesin.

“Është hera ime e parë këtu. Më pëlqen që vezët janë nga zona lokale. Nuk është një korporatë e madhe, por një biznes i vogël ku mund të shohësh gjithë procesin”, u shpreh Anita Gross, kliente.

Për shumë biznese lokale, këto vezë janë bërë pjesë e traditës së përvitshme.

“Jemi shumë të kënaqur me këto vezë, nuk janë as shumë të forta, as shumë të buta. Çdo klient në dyqanin tonë merr një vezë për Pashkë”, u shpreh Hermine Krach, kliente.

Sipas traditave të hershme, veza simbolizon jetën, rilindjen dhe pranverën, një kuptim që është ruajtur ndër shekuj dhe është bërë pjesë e festimeve të Pashkëve.